سياسي ځواکونو سره د غني تر ځانګړو مجالسو

تميم توفيق
ابله ورځ اشرف غني په ارګ کې له مشهورو سياستمدارانو او سياسي ځواکونو سره ځانګړې ناسته لرله، ويل کيږي چې غني هر د سياسي ګوند مشر ځانګړې کوټې ته د ملاقات لپاره غوښتی او د نورو له انظارو پټ يې ورسره مجلس کړی دی.
په نژدې ورځو کې د پارلمان او ولسواليو د شوراګانو انتخابات راروان دي او په هغو پسې بيا د ولسمشرۍ د انتخاباتو وار دی. په دې انتخاباتي مهم دور کې له سياستمدارانو سره د غني ناسته او ځانګړي مجالس پر ځای او د ده لپاره خورا مفيد عمل و؛ ځکه چې همدا سياست مداران او د هغوی حمايت کونکي به وي چې خلک انتخاباتي حوزو ته بوځي او د يو چا په ګټه پرې رايه ورکړي، که دا د غني په ګټه وشي؛ نو د ده لپاره د کورتو پر سر کورني غوړي دي.
دغو سياسيونو څه موده وړاندې د ملي وحدت حکومت په انتخاباتي طرزالعمل اعتراض کړی و او ويلي يې و چې انتخابات بايد حزبي شي او له بايوميترک سستم نه په استفاده وشي، تر څو د درغلۍ مخه ونيول شي، هغه مهال د دولت لخوا دغه اعتراض بابيزه وګڼل شو، خو د وړمې ورځې مجلس څرګندوي چې ارګ د اعتراض بوج احساس کړی دی.
د سياسي احزابو له مشرانو سره د غني د ملاقات يوه موخه دا هم وه چې ملاتړ يې خپل کړي، ارګ فعلا هيڅ سياسي ګوند نه لري او هغه چې د ۲۰۱۴ په انتخاباتو کې يې د ده ملا تړلې وه، هم د ملي وحدت حکومت د ويش په مهال ترې ناراضه شوي دي او د اپوزيسيون په صف کې دريدلي دي.
دغه راز حکمتيار چې ارګ ته تر نورو نژدې بلل کيده، هغه هم ترې فاصله نيولې او له هغو سره اوږه په اوږه د ارګ په مخالفت کې ولاړ دی، چې د ارګ له لوري د انتخاباتو په ټاکل شوي نظام سر له اوسه شکمن دي او ويره لري چې که رايه اچونه د ارګ په طريقه اداره کيږي؛ نو له هر چا ډير به دغه سياسي ځواک له انزوا سره مخ شي.
د ګوندي سياستمدارانو دغه ويره وه چې غني يې هم واک ته د نه رسيدو له ويرې سره مخ کړ او مجبور يې کړ چې هر يو له بله بيل وويني او د جلا اُميدونو په ورکولو سره يې د ځان په ګټه وڅرخوي.
افغانان له ډير پخوا نه په دې يقين دي چې د اشرف غني په شمول د ټولو سياسي ګوندونو کابل ميشتي او يرغل پلوي مشران د هيواد او هيوادوالو امن او ثبات ته چندانې ژمنتيا نه لري او هغه څه کوي چې د خپل سياست او ځان په ګټه يې تماميږي، هغه که هر څو د هيواد او ولس په زيان هم وي.
دې مجالسو ته په کتو داسې ښکاري چې اوسنۍ او راروانه سياسي اوضاع د ولس دا يقين نور هم پخوي؛ ځکه چې اشرف غني به لکه د تير په څير يو ځل بيا واک ته د رسيدو په مينه کې اساسي قانون تر پښو لاندې کړي او سياسي احزاب به هم د ځينو ارمانونو د ترسره کيدو په پار له ټولو هغو دريځونو تير شي، چې فعلاً يې د هيواد او ولس په ګټه بولي.
که داسې وشي، چې حالاتو ته په تناظر ډير امکان لري؛ نو تر لمر به روښانه شي چې د اشغالګرو امريکايانو د استعماري اهدافو ملګري سياستمداران د خپلو نااشنا سليقو پيروان دي، چې نه ورته اساسي قانون کوم اهميت لري، نه په وطن کې امن او ثبات ورته مهم دي، نه د ولس په غميزو او ناخوالو درديږي او نه هم ورته ملي ارزښتونه چندانې قيمت لري، اسلام او ديني ارزښتونه خو خورا لرې خبره ده.
نو په دې بناء، هغه وګړي چې د دوی په کيسو تيروتلي، خو په ديني او ملي ارزښتونو او د هيواد او ولس په غم درديدونکي دي، بايد راتلونکې ته اماده اوسي او چې کله د نورو هيوادوالو په څير دوی هم پورته ياد شوي يقين ته ورسيدل؛ نو د دې ټولو د اشغال ډول ته ګډيدونکو په وړاندې دې هغسې کلک دريځ خپل کړي، لکه د بهرنيو يرغلګرو او د هغوی د کورنيو ملګرو په وړاندې چې څو مبارزينو خپل کړی دی، تر څو مو هم دين او وطن له دې قساوتګرو او پرديپالو خلاص شي او هم مو ولس د ارام سا واخلي.
د هماغې ورځې په هيله.