(کابل ټکی کام ۱۳۹۷ وږی ۱۰)
د ننګرهار چارواکي وایي، چې په دې ولایت کې له څو ورځو را په دې خوا د پاکستان قونسلګرۍ تړل شوې.
چارواکي وایی د قونسلګرۍ د تړلو په لامل نه دي خبر، خو په دې وروستیو کې په یاد ولایت کې د کلدارو په راکړه ورکړه بندیزونه لګول شوي و.
دوی زیاتوي، د قونسلګرۍ تړل د ویزه اخیستونکو افغانانو لپاره لوی سر خوږی جوړ کړی.
بل پلو په کابل کې د پاکستان سفارت رسنیو ته ویلي، چې په جلال اباد ښار کې یې د قونسلګرۍ چارې د شته امنیتي ستونزو له امله تړلې.
سفارت دغه راز ویلي، د قونسلګرۍ په چارو کې د ننګرهار والي حیات الله حیات لاس وهنه کوله چې دا کار د ویانا له کنګرې سرغړونه بلل کیږي، نو له همدې امله یې قونسلګرۍ تړلې.
پاکستاني چارواکی وایي، د موضوع د حل په موخه یې د افغانستان د بهرنیو چارو وزارت ته خپل اعتراض سپارلی دی.
تر اوسه افغان چارواکو په دې تړاو څه نه دي ویلي.
