تبصره
ټرمپ د امریکا د جمهوري رياست په تېرو انتخاباتو کې کامياب شو، خو چا چې د کاميابولو رايه ورکړې هغه هم اوس پښېمانه دي. وايي، ټرمپ د امريکا لپاره پر ځای د دې چې ګټه راوړي، په نړيواله کچه یې امريکا د زوال په لوري روانه کړې ده، چې تر ټولو مهمه یې د بيت المقدس، عراق، افغانستان او سوریې په اړه دامريکا د ولس د رايو پر خلاف پاليسي غوره کول دي .
د افغانستان لپاره په پاليسۍ کې ټرمپ ډيرې تېروتنې وکړې. دمخه چې ټرمپ د جمهوري رياست لپاره انتخاباتي کمپاين کاوه، په وار وار یې ويلي و چې د افغانستان جګړه به پای ته رسوي او امريکا به په اقتصادي لحاظ غښتلې کوي.
خو دا دی ګورو چې د افغانستان د جګړې له دوام سره سره، ټرمپ د سوریې جګړه هم د امريکايي ولس پراوږو وراچوي، چې دا بار پورته کول د امريکايي ولس لپاره ناشوني دي .
پخپله په امريکا کې تر درې ميليونو پورې وګړي د کرايه کورونو د ورکړې توان نه لري، او د افغانستان د پردۍ او بايللې جګړې لپاره د ټرمپ ادارې په ميلياردونو ډالر ومنل چې بايد په افغانستان کې په پوځي چارو مصرف کړل شي.
د ټرمپ په اداره کې د هغه نږدي ملګري د هغه له حکومتولۍ سره مخالف دي، وايي د امريکا لپاره د ټرمپ پاليسي په تاوان روانه ده.
د ټرمپ په حکومت کې زياتره هغه کسان پر لوړو پوسټونو کار کوي چې يا ورسره د تنظيم په داخل کې له مخالفتونو سره مخ دي او يا یې پر لوړو پوسټونو کارکوونکي د بد اخلاقيو او د جنسي جرمونو مجرمين دي .
په نيويارک ټايمز کې د خپرې شوې مقالې ليکوال ليکي: د ټرمپ د ادارې دننه ځینې کسان کوښښ کوي چې د هغه د ایجنډا له ځینو برخو سره خپل مخالفت وښیي، چې د مخالفتونو لړۍ په استعفاګانو او مخالفتونو ښوولو پیل شوې ده.
که په امريکا کې پر ټرمپ کودتا وشوه، ورسره سم به په افغانستان کې د اشرف غني حکومت هم له منځه تللى وي. پر ټرمپ کودتا به داسې مانا ولري لکه د اشرف غني پر حکومت چې کودتا شوې وي.
د اشرف غني حکومت د خپلو داخلي اختلافاتو او د طالبانو د پرلپسې بريدونو له امله د ګړنګ پر غاړه ولاړ دی. هره ورځ ترې يوه يا دوه ولسوالۍ طالبان نيسي. د جوزجان ولايت خم آب ولسوالي ترې طالبانو ونيوله. دفاع وزارت وايي د ميدان وردګو پر دايمرداد ولسوالۍ د حکومتي پوځونو او طالبانو تر منځ جګړه روانه ده، خو طالبان وايي، ولسوالي مو ترې ونيوله .
په کندز، سمنګان کې هم د جګړو له امله ولس نور اړ دی چې يا له سيمې کورونه وباسي، ځکه د کندز دشت ارچي کې د طالبانو لخوا د ١٨ عسکرو د وژل کېدو او تر ٢٣ پورې د نورو د ټپيانېدو په بدل کې د ناټو ځواکونو د ولسي وګړو پر کورونو بمبار کړی، چې ولسي وګړي د کورونو پرېښودو ته اړ کوي. افغان ولس د ټرمپ له پاليسۍ او د اشرف غني د حکومت له حکومتولۍ پوزې ته راغلی دى. پر ټرمپ کودتا او د کابل حکومت نسکورېدل دواړه سره تړلي دي.
