(کابل ټکی کام، ۱۳۹۷، تله ۱۰)
د امريکا ولسمشر ډونالډ ټرمپ د يوه امریکايي عسکر روالډ شورير د ستاينې په مراسمو کې هغه دوه افغانان ترجمانان هم ستايلي چې په يوه جګړه کې يې د ټپي شويو امريکايي عسکرو درملنه او خدمت کړی و.
دغه دوه ترجمانانو چې (بهروز مومنداو زکريا) نوميږي په ۲۰۰۸ کال کې يې د نورستان ولايت په دواب ولسوالۍکې د جګړې پر مهال د ټپي امريکايي عسکرو خدمت او درملنه کړې ده.
ټرمپ وويل چې امریکا د خپلو ټولو خدمتګارانو قدر کوي او فعالیتونو ته یې په درنه سترګه ګوري.
امريکايي عسکر رونالډ شورير ته د امريکا کانګرس افتخاري مډال ورکړ او په دې اړه په جوړه شوې غونډه کې نوموړو افغان ترجمانانو هم ګډون کړی و چې د ټرمپ له لوري وستایل شول او هغوی ته هم ډالونه ورکول شول.
په دغه جګړه کې چې نورستان ولايت کې پېښه شوې وه د ادرېس په نوم يو افغان ژباړن پکې وژل شوی و چې د شورير په وينا اوس يې پرخپل ځوی د ادریس نوم ايښی دی.
شورير په ۲۰۰۹کال کې له پوځ سره دنده پرېښې او وروسته يې د ولسمشر د ساتونکو په ډله کې ځان شامل کړ خو اوس مهال نوموړی پر سرطان ناروغۍ اخته شوی دی.
له کله چې بهرنيو عسکرو په افغانستان يرغل کړی له هغې راهيسې د بهرنيانو ترڅنګ سلګونه افغان ژباړونکو د هغوی د دفاع لپاره ځانونه قرباني کړي او ځينې نورو بيا په بهرنيو هېوادونو کې د پناه غوښتنې کړي چې ډير کم شمير ژباړونکو ته يې پناه ورکړل شوې خو ډيری نور بيا وايي چې حکومتونه ورته د ژوند اسانتياوې او د کار موندنې فرصتونه نه برابروي.
