موږ افغانانو ته تر ټولو لویه مسئله د بهرني اشغال پای ته رسول دي. د بهرني یرغل پر وړاندې له تېرو اوولس کلونو راهیسې مبارزه روانه ده او فتحه ان شاء الله نږدې شوې ده. د امریکايي چارواکو د اوسنیو څرگندونو نه معلومېږي، چې دوی به افغانستان پرېږدي او خپلې پښې به سپکوي. همدا تېره میاشت همدغو بهرنیو یرغلگرو په ننگرهار، هلمند، کاپیسا، میدان وردگو او نورو ولایتونو کې له سلو ډېر افغانان شهیدان کړي او له ۲۰۰ ډېر یې ټپیان کړي دي.
په اوس وخت کې موږ نه خپل چارواکي لرو، نه مو ځمکه په خپله اراده کې ده او نه هم فضا، بلکې هر څه د امریکایانو په اختیار کې دي او په خپله خوښه یې استعمالوي. دوی زموږ پر کورونو، جوماتونو، ودونو، جنازو او په خپل لاس روزل شویو عسکرو هم بمباري کوي، خو هېڅکله یې په خپلو عسکرو بمباري ونه کړه.
عجیب حالت دی. هېواد مو د نړۍ ۴۸ کفري هېوادونو یرغمل کړی، خو دلته خلک د هېواد، دین، خاورې او اسلام په نامه له خلکو رایې غواړي. امنیتي حالت تر دې خراب دی، چې هېڅوک ځان خوندي نه گڼي، بلکې د هر افغان په زړه کې وېره ده. هر ساعت د چاودنې، بمبار، وژنې، ترور او تښتونې احتمال شته، خو بیا هم خلک غونډې کوي، خلک تېرباسي او په غوړو ژمنو له خلکو رایې غواړي.
مسلمان باید له یوې سوړې دوه ځلې ونه چېچل شي. همدغه ولسي جرگې په تېرو اتو کلونو کې کومه لاسته راوړنه لرله، چې خلک بیا ټاکنو ته وربولي؟ همدغه ولسي جرگې له امریکا سره شوي امنیتي تړون ته مثبته رایه ورنه کړه؟ همدغه وکیلان پکې ناست نه وو؟ خو نن یې د څلورو کلونو مخکې سترگې لرې کړي او بیا له خلکو رایې غواړي. د ولسمشرۍ په ټاکنو کې د امریکا د بهرنیو چارو مخکېني وزیر جانکېري لاسوهنه ونه کړه او اوسنی گډ حکومت یې افغانانو ته په میراث پرېنښود؟
څو چې موږ خپلواک شوي نه یو او خپل خلک، خپل چارواکي، خپل پوځ، خپل حکومت او ملت ته ځواب ویونکی حکومت مو لاسته راغلی نه وي، تر هغه وخته دلته ټاکنې هېڅ معنا نه لري. د ټاکنو د کمپاینونو نه مخکې دلته ځینې نوماندان بریالي اعلان شوي، ځینې خلک پردیو سفارتونو ودرولي، د ځینو تر شا گاونډیان او استخباراتي ادارې ولاړې دي او باالاخره د افغانستان راتلونکې ولسي جرگه به د نړۍ د استخباراتي سازمونو گډه ټولگه وي او اوسني شعارونه به یې ټول له مخې هېر کړي وي.
پرون د ننگرهار په کامې ولسوالۍ کې د یو نوماند په کمپاین غونډه کې چاودنه شوې، چې ۱۳تنه مړه او له ۳۰ ډېر ټپیان شوي دي. ایا د ولسي جرگې ارزښت د یوه انسان له ژوند نه هم ډېر دی؟ ایا دغه بلواکه ټاکنې په دومره قربانۍ او لگښت ارزي؟ ایا دغه خلک به پر خپلو ژمنو وفا وکړي؟ نه، نو ولې موږ بیا هم راتلونکو ټاکنو ته هیلهمن یو او د دوی په تشو شعارونو تېرایستل کېږو؟
موږ باید خپل لومړیتوبونه درک کړو او د امریکايي یرغل پر وړاندې ټول په گډه مبارزه وکړو او خپله خاوره له بهرني یرغل څخه پاکه کړو. بیا که څوک ولسي جرگې ته نوماند کېږي او له خلکو رایې غواړي، نو بیا به زموږ هیلهمندي تر یوه حده سمه وي، گنې همدغه خلک به بیا زموږ پر سرونو پنځه کاله حکومت کوي او ټولې پرېکړې به یې زموږ د ارزښتونو پر ضد وي.
