ليکنه : مجاهد افغان
تېره اونۍ په اجتماعي رسنیو کې د داعش پلویانو داسې انځورونه خپاره کړل، چې په کې ښکاري د پنځمې هجري پیړۍ د تر ټولو ستر او وتلي ديني عالم أبوحامد محمد الغزالي رحمه الله چې په امام غزالي شهرت لري، شاهکار کتاب احیاء علوم الدین ته اور اچول شوی دی، ددغو انځورونو په اړه ویل شوي، چې دغه کار د داعش تر واک لاندې البرکه سیمه کې دداعش لخوا ترسره شوی دی. له دې وړاندې په تیره جنورۍ میاشت کې داعش منلی و چې د موصل د مرکزی کتابخانې له اته زره ټوکه زیات کتابونه یی سوځولی او د نینوا موزیم تر سل زره ټوکه زیات اثار چې زیاته یی قلمی نسخې ، مخطوطی او نایاب کتابونه وو هم له منځه وړی دی.
د بابل د تاریخی آبداتو او د سوریې د پالمیرا د ماقبل اسلام تاریخی معابدو د تخریب غوندې پخوا عمومی باور دا و چې داعش به یوازې غیراسلامی کتابونه او اثار له منځه وړی اما په دې وروستیو کې ښکاره شوې چې داعش د فقهې، تصوف،اسلامی ادب او دغسې نورو کتابونو په شمول ټول هغه اثار سوزوی چې ددوی له افراطي غیرتقلیدي تفکر سره موافقت ونلری، چې په دې لړ کې د شافعي المذهب امام غزالي رحمه الله ارزښتمن اثار هم په ممنوعه کتابونو کې بلل شوی دی.
د کتابونو سوزول
د اسلامی کتابونو سوزول، یا د اسلامی فرهنګ، تمدن ، علم او معنوی شتمنیو له منځه وړل کوم داسې عمل نه دی چې یوازې داعش یی ترسره کوی، له دې وړاندې هم د اسلام د لومړنیو پیړیو د ارزښتمنو اثارو د سوزولو پیښې تکرار شوی دی چې مهمې یی د مغول هلاکو لخوا د بغداد له اشغال وروسته ددې ښار د ۳۶ کتابخانو سوزول دی دغه راز په اندلس کې د هسپانوی اشغالګر کاردینال لخوا د مسلمانانو د ټولو کتابونو له منځه وړل دی. دغه شان ویل کیږی چې په دې وروستیو کې په مصر کې د جنرال سیسی لخوا هم ګڼ شمیر اسلامی کتابونه سوزول شوی دی.
هلاکو ، کاردینال او جنرال سیسی که اسلامی کتابونه سوزوی نو علت یی ټولو ته څرګنددی ځکه هغوی ټولو غیراسلامی یا اسلام ضد مفکوره درلوده نو ځکه یی اسلامی کتابونه نه شوی زغملی، اما سوال دادی چې داعش چې له یوې خوا د اسلام شعار پورته کوی او ځان تر هرچا ښه مسلمان بولی مګر بله خوا یی د اسلامی اثارو په له منځه وړلو پسې را اخیستی ددې علت څه دی؟
د ستونزې جرړه
داعش یا هغوی چې ځان ته دولت اسلام وایی، په فکری او منهجی لحاظ له افراطی سلفیت سره تړاو لری، شاذ یا افراطی سلفیان د نورو اسلامی مذاهبو یا معتدل سلفیت څخه جلا ځینی تفردات لری، مثلا د څلورو مذاهبو له جملې د هر مذهب خاوند دا جائزه بولی چې په پراخ زړه د بل مذهب په خاوند پسې اقتداء وکړی، همداسې د مخالف مذهب والا ورته رښتینی مسلمان بریښی ، کتابونه او امامانو ته یی احترام لری او په ګډ ژوند کې ورسره هیڅ ستونزه نه احساسوی.
اما سرسخته سلفیان په مقلدینو پسې لمونځ نه کوی،مقلدین ورته ګمراه ښکاری او ځانونه موحدین بولی، د مقلدینو امامانو ته احترام نلری، حتی د هدایه، رد المحتار او نورو فقهی کتابونو په داسې انداز سپکاوی کوی چې ښایی څوک د مطلق کتاب هم داسې سپکاوی ونه کړی.
سرسخته سلفیان چې یوه بیلګه یی همدا داعشیان دی له خپلو څو رسالو پرته نور هیڅ دینی علم، ثقافت او فرهنګی ارزښت په رسمیت نه پیژنی.
د هند ستر عالم مولانا ابوالحسن ندوی صاحب چې له مذاهبو او اسلامی فرقو یی ژور معلومات درلودل، نوموړی د معاصر سرسخته سلفیت تر ټولو لویه ستونزه دابلله چې دوی له خپلو څو رسالو پرته د اسلامی امت په ټوله فقهی،عرفانی،ادبی او ثقافتی پانګه دبطلان کرښه راتیروی، دوی مذاهب مردود بولی نو ځکه له مذاهبو سره تړلی کتابونه هم ورته د زغملو وړ نه دی، دوی تصوف بدعت بولی نو ځکه د اسلامی فرهنګی ټوله عرفانی پانګه چې د امام غزالی کتابونه هم په کې شامل دی مردود بولی، دوی د قرآن او حدیث په ظاهر نص باندې استدلال کوی نو ځکه بیلابیل لغوی،فقهی او ادبی تفاسیر چې هر یو یی د الله تعالی معجز کلام له نوې زاویې را سپړی دوی ته اهمیت نلری،په دې ډول ددوی فکر دې ته منجر کیږی چې د اسلام د څوارلس سوه کلن مدنیت او ثقافت ټول معنوی او لیکلی ارزښتونه له منځه یوسی او اسلام یوازې د هر سړی په ځانی اجتهاد کې خلاصه کړی.
اما دوی باید پوه شي!
اما دغه خلک چې اوس یی د داعش تر بیرغ لاندې د مسلمان امت په بیا مسلمانولو پسې را اخیستی دوی باید پوه شی،چې صراط مستقیم یی خطاء کړی دی،د دوی یوه ستره غلطی داده چې په خپلو ترواک لاندې سیمو کې خلک په زور د مذاهبو له اتباع او تقلید څخه اړوی او خپله مفکوره ورباندې منی،هغه څه چې تراوسه د اسلام په تاریخ کې مثال نلری.
د امت په اتفاق څلور مذاهب حق بلل شوی او له دې پرته نورې ډلې مردودی دی، اسلام هیچا ته دا حق نه ورکوی چې بل مسلمان د ټوپک په زور د امام شافعی له مذهب څخه واړوی او خپل د پنځلسمې پیړۍ مذهب او فردی اجتهاد ورباندې ومنی، حتی اسلام مسلمانانو ته نه دی ویلی چې کفار په زبردستۍ او زور سره مسلمان کړئ یا د هغوی مذهبی اثار او معابد وسوزوئ، نو ځکه خو کفار کولی شی د جزیې په اداء کولو سره په اسلامی خاوره کې واوسی.
بله دا چې دداعش همفکرو د واقعی سلفیت تګلاره هم خطاء کړې ده، واقعی سلفیان هیڅکله له نورو مذاهبو سره داسې چلند نه کوی،موږ په افغانستان کې د قاعده الجهاد تنظیم مشران ولیدل چې له خپلو مذهبی وروڼو سره یی په پوره صمیمیت د ورورۍ ژوند کاوو، د شهید عبدالله عزام رحمه الله اثار او ملفوظات که تاسو ولولئ نو پوه به شئ چې هوښیار او باعلمه سلفیان د مقلدینو په اړه څومره ښه او عادلانه نظر لری، د نړیوال جهاد وتلی مشران هغه چی سلفی فکر لری که تاسو ددوی اثار وګورئ نو په خپلو کتابونو کې بیا بیا دامام غزالی رحمه الله په کتاب احیاء علوم الدین باندې استناد کوی، مطالب ترینه اقتباسوی هغه حجه الاسلام بولی او له نامه سره یی رحمه الله لیکی. اما دغه داعشیان چې تر ټولو زیات زیان یی اسلام او مسلمانانو ته اړولی او په مسلمانانو کې یی بیا تر ټولو ډیر ه بدرنګی سلفی منهج ته پیښه کړې، دوی لکه څنګه چې د متقدمو مجتهدینو له اتباع ځان خلاص بولی د متاخرو او معاصرو علماء هیڅ رایه او نظر هم نه منی، همدا لامل دی چې هیڅ معاصر مسلمان عالم سلفی یا مذهبی ددوی د کړنو تائید نه دی کړی بلکې واقعی سلفی مجاهدینو هم ترینه لار بېله کړې ده. دا چې دوی له امت څخه کاملا لاره بیله کړې او اتباع السلف هم نه کوی نو دوی باید سلفیان هم ونه بلل شی بلکه یوازې داعشیان وبلل شی، معتدل او حقانی سلفیان باید له دوی څخه برأت اعلان کړی او افغان اولس باید دوی ته یو قاطع ځواب ورکړی، ځکه که دغه شاذه او منحرفه ډله په دې اولس واکمنه شی نو نه یوازې داچې له سره به عقیدې او نکاح ګانې ور باندې اعاده کړی بلکې ټول ارزښتمن کتابونه لکه هدایه، احیاء علوم الدین او نور به هم د ایرو په په ډیرۍ وربدل کړی.
بله دا چې په دې هم باید پوه شو چې داعش نه یوازې دا چې د واقعی مؤمنانو او جهادی حرکتونو دښمنه ډله ده،چې د جیش الاسلام، جبهه النصره، حماس او امارت اسلامی د مجاهدینو د وینو ویالې بهوی او په ډول ډول ذبحه کولو سره د مؤمنو زلمیانو له مرګه خوند اخلی ، بلکې دا ډله لکه څنګه چې دمسلمانانو دسر او مال دښمنه ده همداسې یی د معنویت، فرهنګی او ثقافتی شتمنیو دښمنه هم ده.
دوی غواړي د کتابونو او کتابخانو په سوزولو سره اسلامي امت له هغو معنوي ارزښتونو څخه په بشپړه توګه تش لاس کړي چې په څوارلسو پیړیو کې راغونډې کړې ، هغه چې د امت یوازینۍ فرهنګی پانګه او د اسلامی تمدن او کلتور شتمنۍ بلل کیږی، د یوه ملت په حق کې تر ټولو ستره جفا د هغه ملت په معنوی شتمنیو او کلتور باندې تجاوز دی، ځکه ملت چې ملت بلل کیږی او له نورو یی امتیاز کیږی نو په ثقافتی اقدارو او ارزښتونو کیږی نه په بل څه . اجازه مه ورکوئ چې داعش مو بې ثقافته کړي.
