نعمان لطیف
امریکایان په افغانستان کې له هرې خوا او په هره برخه کې داسې وځپل شوه چې که له دې خاورې خپل وجود روغ وکاږلی شي هیڅ کله به دکوم هېواد لاندې کولو جرأت ونکړي.
دا خبره مسکو کې دسولې په تړاو داېرېدونکې غونډې ته دکابل تر لېږلي پلاوي را یاده شوه.
دمسکو غونډې ته چې توقع ده د افغانستان څخه په سوله ئیزه توگه د یرغل دخاتمې لپاره به پکې دطالبانو او کابل پر شمول، دگاؤنډیو هېوادونو ترمنځ سلا مشورې وشي؛ طالبانو لا له وړاندې پنځه نفري پلاوی چې مشري ئې دقطر دفتر مسؤل ملا محمد عباس ستانکزي پر غاړه ده، لېږلی دی خو کابل بیا د مسکو غونډې ته د کم تجربه ماشومانو او اضافه بست مشرانو ټیم استولی دی. دکابل استول شوی ټیم په خواله رسنیو کې د نن، او پرون خندنۍ موضوع گرځېدلې ده
دمسکو غونډې په کابل او امریکا دډار پېریان کښېنولي دي؛ کله وایي ورځو او کله وایي نه ورځو. که امریکایان ووایي چې موږ د مسکو غونډه کې شرکت کوو، کابل هم یو څو اضافه بست مامورینو ته بکسونه وتړي، او که امریکا ووایي چې موږ پکې نه یو، کابل هم سترگې برگې او غونډه تحریم کړي
دملي امنیت پخواني سلاکار حنیف اتمر دهمدې غونډې پر سر د پیدا شویو اختلافاتو له امله استعفاء وړاندې کړه. حنیف اتمر دغني دنظام له مهمو مُهرو څخه گڼل کېده او وړمه ورځ ئې دسولې شورا ددارالانشاء رئیس اکرم خپلواک هم استعفا ته اړ ایست
اکرم خپلواک د سولې شورا کې ددارالانشاء په ریاست سربېره، په سیاسي چارو کې د غني سلاکار هم ؤ، اما کله چې دسولې خبرو کې په امریکایانو برسېره گاونډیان هم کابل له پامه غورځوي، اکرم خپلواک له دواړو دندو استعفاء وړاندې کوي
که څه هم اکرم خپلواک د سولې په نوم زیاتې گټې وکړې. هر ولایت کې ئې وخت پر وخت د وسله والو دتسلېمیدو نمایشونه ترسره کړل او د تسلیمۍ په کاذبو تمثیلونو ئې بېدرېغه د ملت مال وواهه خو کله چې وپوهېد نور ئې نمایشي کړنې رسوا کیږي، استعفاء ئې وړاندې کړه او ډاکټر غني ئې په داسې نازک پړاو کې یواځې پرېښود چې تر بل هر وخت ئې زیات ضرورت ورته لره
ښکاري دکابل غني واکمن له هرې خوا فقر زده شوی دی. هغه افراد چې پر ده ئې ننگونه کول یو ـ یو ئې له څنگ څخه جلا کیږي، او حتی مخالفت ته ئې ملاوې تړي
دمسکو غونډه چې نن پیلیږي د نړۍ د دریو لویو طاقتونو او پاکستان او ایران لوبېدلي دېپلوماتان به گډون پکې وکړي، د کابل لخوا دداسې پلاوي استول چې نه تجربه لري، نه دنړۍ دپېچلو سیاستونو په اړه معلومات لري، او نه هم په ملت او نظام کې نفوذ او سیاسي ملاتړ لري؛ جؤتوي چې ډاکټر غني له هرې نگاه په فقر اخته شوی دی او آن امریکایان هم نور نه غواړي د غني له ناکامې حکومتولۍ دفاع وکړي
د مسکو غونډه چې له یوې خوا طالبانو ته دسیاسي نفوذ زیاتولو مواقع زیاتوي، له بلې خوا دغني دسیاسی فقر اشارې له ځانه سره لري
وروستي راپورونه وایی د امریکایانو خاص استازی زلمي خلیل زاد هم دسیمې هېوادونو ته سفرونه تېز کړي دي، داسې گنگوسي هم شته دی چې که په هر قیمت وي امریکایان له طالبانو سره سولې ته ځان رسول غواړي
همدا لامل دی چې ډاکټر غني د رجالو د فقر سره مخ دی او دڅنگ یاران یو ـ یو له ده لارې جلا کوي او پر خپله مخه ځي. دوی ویني چې دغني ستوری په گردش کې دی، نور نه غواړي دهغه نظام برخه شي چې نه واک لري، نه ثبات او نه د ائنده تضمین.
