(کابل ټکی کام ۱۳۹۷ لړم ۲۰)
د افغان سولې په برخه کې د امریکا خاص استازي زلمي خلیلزاد د ملي یووالي د حکومت له مشر اشرف غني او د بلخ له پخواني والي “عطامحمد نور“سره جلا جلا ناستې کړې دي.
د ارګ د خبر پاڼې د خبر له مخې، خلیلزاد د سولې په برخه کې د خپلو سفرونو او په دې برخه کې له پرمختګونو څخه جمهور رئیس خبر کړی او د سولې په مذاکراتو کې یې د افغانانو پر مالکیت او مدیریت ټینګار کړی .
اشرف غني هم له خلیلزاد څخه مننه کړې او ترې غوښتي یې دی چې د راتلونکو سفرونو جزئیات ورسره شریک کړي.
اشرف غني داسې مهال دا غوښتنه کوي چې خلیلزاد په تیر سفر کې له جمهور رئیس غني سره د خپلو سفرونو هیڅ ډول معلومات نه ؤ شریک کړي او د ارګ مشرانو ته یې هیڅ ارزښت نه و، ورکړی.
په یوه بل خبر کې ویل شوي چې خلیلزاد د بلخ له پخواني والي عطانور سره هم لیدنه کړې او له نوموړي سره یې د سولې د خبرو سربیره د انتخاباتو پر موضوع هم خبرې کړې.
سرچینې وایي، اشرف غني غواړي د راتلونکي انتخاباتي ټکټ لپاره له عطانور سره ګډ ټیم جوړ کړي او په دې توګه د شمالي ولایاتو رایې هم ترلاسه کړي.
ټاکل شوې ده چې خلیلزاد به تر دې وروسته پاکستان، قطر، متحده عربي اماراتو او بیرته کابل ته راستون شي.
