(کابل ټکی کام، ۱۳۹۷، لیندۍ ۸)
د ملګرو ملتونو سرمنشي انتونيوګوتيرس له طالبانو سره په مخامخ خبرو ټنګار کړی او له افغان حکومت يې غوښتي چې د افغانستان کړکيچ ختمولو لپاره دې له طالبانو سره مخامخ خبرې وکړي.
انتونيو ګوتيریس د جنيوال په پرونۍ ناسته کې وويل، چې د افغانستان بحران بايد له سياسي لارو پای ته ورسيږي په وينا يې افغان حکومت او طالبان دې دا موقع له لاسه نه ورکوي.
په دغه کنفرانس کې د ګوتیریس سربېره امريکايي چارواکو، اروپايي ټولنې، روسيې، چين او د سيمې نورو هېوادونو هم د افغان سولې لپاره له طالبانو سره د مخامخ خبرو غوښتنه کړې ده.
په دغه غونډه کې ولسشمر غني هم برخه لرله او د خپلې وينا پر مهال يې وويل چې یوه مذاکراتي ډله يې جوړه کړې څو له طالبانو سره د سولې خبرې وکړي خو طالبانو له يادې غونډې وروسته د اشرف غني د خبرو په غبرګون يوځل بيا وویل چې دوی د له بې واکه او د پردو لخوا تپل شوو جهتونو سره مذاکرات کول د وخت ضایع کیدل بولي.
طالبانو په ياده اعلاميه کې ويلي، اسلامي امارت د افغان مجاهد او قهرمان ملت په استازيتوب او په خپل مالکیت د مقدس جهاد د کامیابي لپاره له امریکايي اشغالګرو سره هم جګړه کوي او هم مذاکرات کوي.
په اعلاميه کې راغلي، د کابل رژیم د امریکایانو لخوا رامنځته شوی او پر افغان مسلمان ملت تپل شوی دی، دغه رژیم نه د افغانستان د خلکو نظام دی او نه هم د افغان میړني او مجاهد اولس نمایندګي کولای ش.
طالبانو له بې واکه او د پرديو له خوا د تپل شويو جهتونو سره مذاکرات د وخت ضایع کول بلل زياتوي “ځکه چې بې واکه جهتونه د پریکړو اختیار نه لري.”
تر دې مخکې د طالبانو د استازو او د امريکا د بهرنيو چارو وزارت د سولې د پلاوي چې مشري يې زلمی خلیلزاد کوي د افغانستان شخړې د ختمولو او د بهرنيو ځواکونو د وتلو لپاره څو ځلې مذاکرات شوي چې د دواړو غاړو په وينا لا به هم په راتلونکي کې دغه ډول ناستې جريان پيدا کوي.
