(کابل ټکی کام، ۱۳۹۷، لیندۍ ۲۰) له بدخشان ولايت څخه ولسي جرګې ته د یوه ناکام نوماند پلويانو لاريون کړی او د دغه ولايت مرکز ته ټولې ورغلې لارې يې تړلې دي.
د ټاکنو کمېسيون تيره ورځ د پنځو (لوګر، پکتيکا، بدخشان، بلخ، فارياب) ولايتونو ته ولسي جرګې ته د برياليو نوماندانو پايلې اعلان کړې.
له بدخشانه عبدالرووف انعامي، عبدالشکور واقف حکیمي، مولوي ذبيح الله عتيق، عبدالولي نیازی، حجت الله خردمند، فضل عظیم زلمی مجددي، احمد ضيا يفتلي، نيلوفر ابراهي او صادقه اديب د ولسي جرگې د ټاکنو په لومړنيو پايلو کې بريالي اعلان شوي خو د دغه ولايت څخه د (صفرمحمد مبارز) په نوم يو تن چې په معاون صفر مشهور دی ټاکنو کې ناکام شوی دی.
د بدخشان واي احمد فيصل بیګزاد وايي، د یاد تن يو شمير وسله والو چې غير مسووله وسله وال هم دي د کشم- فیض اباد لارې د ترافیکو پر مخ تړلي دي.
نوموړی وايي، هڅه کوي چې دغه لاریون ژر پای ته ورسوي او يادې لارې د ترافیکو پر مخ پرانيستل شي.
ويل کېږي، د صفر مبارز په نوم یاد تن د ولسي جرګې ټاکنو کې (درې زره اته سوه) رايې وړې وې چې په وينا يې له رايو سره يې درغلي شوې او ضایع شوي دي.
تر اوسه د ټاکنو کمېسيون په دې اړه څه نه دي ويلي، خو د انتخاباتو شکاياتو کمېسيون د معلوماتو له مخې د ولسي جرګې د ټاکنو په دوه ورځو کې له يوولس زره څخه زيات شکايتونه ثبت شوي چې ډيری يې په ټاکنو کې د درغلۍ دي.
