ولسي جرګه له نن څخه د پنځو وزيرانو د استيضاح لړۍ پيلوي
(کابل ټکی کام، ۱۳۹۷، مرغوې ۱)
ولسي جرګه له نن څخه د هغو پنځو وزيرانو د استیضاح کولو لړۍ پيلوي چې په سلو کې اویا پراختيايي بودیجه يې نه ده لګولې.
په دغه کسانو کې د فوايد عامې وزير، د عدليې وزير، د مخابراتو او ټکنالوژۍ وزير، د کانونو او پتروليم وزير او له نشه ييې توکو سره د مبارزې وزيران شامل دي.
د ولسي جرګې غړې فوزيه کوفي وايي، د جرګې د پريکړې له مخې به نن د هغو پنځو وزيرانو د استيضاح لړۍ پيل شي چې کمه بوديجه يې مصرف کړې په وينا يې د هغوی د استيضاح کول به یوه اوونۍ وخت ونيسي.
د ولسي جرګې د مالي او بودجې چارو کمېسيون هر کال د وزارتونو له خوا د پراختيايي بودجې لګښت ارزوي او د کابل په اخره کې د جرګې عمومي غونډې ته راپور وړاندې کوي.
