کندهار: شپنيو عملیاتو کې اته تنه ملکيان وژل شوي دي
(کابل ټکی کام، ۱۳۹۷، مرغومې ۲)
د کندهار ولايت په شاوليکوټ ولسوالۍ کې د شپنيو عملياتو پر مهال اته تنه ملکي وګړي وژل شوي چې پنځه يې د يوې کورنۍ غړي دي.
دغه پېښه تيره شپه د يادې ولسوالۍ مربوط د چغنيانو په سيمه کې رامنځته شوې ده.
ځايي سرچينې وايي، د چاپې عسکرو لومړی له يوه کوره يو پلار او څلور زامن راوايستل او وروسته يې په ډزو ووژل.
د سرچينې په وينا، په ډزو کې د همدې کورنۍ درې ميرمنې او د کلي درې تنه نور هم وژل شوي دي.
د شاوليکوټ امنیتي سرچينې په ياده ولسوالۍ کې عمليات تاييدوي خو تر اوسه يې په عملياتو کې ملکيانو ته د اوښتې مرګ ژوبله په اړه څه نه دي ويلي.
د چغنيانو کلي اوسېدونکي وايي، عملياتي عسکرو شپږ تنه کليوال له ځان سره د بنديانو په توګه هم وړي دي.
په وروستيو کې د ګډو ځواکونو شپنيو عملياتو او بمباريو کې د ملکي خلکو مرګ ژوبله زياته شوې ده چې حکومت او نورې بشري ادارې يې هم په اړه چوپه خوله دی.
