(کابل ټکی کام ۱۳۹۷ مرغومی ۷)
راپورونه وایي چې د هرات ولایت په شینډنډ او د هلمند په ګرمسیر ولسوالۍ کې د طالبانو په مخامخ بریدونو او چاودنو کې ګڼو بهرنیو پوځیانو ته مرګ ژوبله اوښتې ده
خبر زیاتوي، نن ورځ د شینډنډ ولسوالۍ اړوند د “زیرکوه“ په نامه سیمه کي بهرنیو او افغان ځواکونو د ګډو عملیاتو تابیا کړې وه، چې د طالبانو له متقابل غبرګون سره مخ او شاتګ ته اړ شوي دي.
د سیمې خلک وایي، ګډو ځواکونو وروسته د خپلو عملیاتو د مسیر لوری بدل کړ او غوښتل یې دبخت آباد اوسنګچال سیموته داخل شي چي د طالبانو له سخت مقاومت سره مخ شول.
طالبان وایي، په ټوله جګړه کي۵ خارجي او۵کمانډوعسکروژل شوي او ۴خارجیان ژوبل دي.
طالبانو خپل لور ته هم د اوښتو تلفاتو پخلی کړی او زیاته کړې یې ده چې؛ بهرنیانو د تلفاتو تر لیدلو وروسته سخته بمباري کړې چې دوه تنه طالبان په کې وژل شوي دي.
طالبانو په یوه بل خبر کې ویلي چې دهلمند ولایت دګرمسير ولسوالۍ اړوند د “جوګرم دښتې“ په سيمه کې د امريکايي ځواکونو د ګزمې پر یوه زغره وال ټانګ دښخ کړل شوى ماين چاودنه شوې چې پکې ټانګ په بشپړه توګه ویجاړ او سپاره عسکر يې ټول وژل شوي دي.
د ناټو د غوڅ ملاتړ ماموریت د دواړو پیښو په تړاو تر دې مهاله کوم سپیناوی نه دی کړی.
