(کابل ټکی کام ۱۳۹۷ مرغومی ۱۱)
طالبانو د “ ورځې خبره “ تر عنوان لاندې مقاله کې چې د دوی رسمي دریځ څرګندوي ویلي،
داسي ښکاري چې ډونالډ ټرمپ، به د امریکا لپاره د نوي امریکایي ګورباچوپ بڼه غوره کړي او په وینا یې چې
“د ټرمپ وروستي حرکات هم دغسي بریښي چې نور د خپل شکست خورده پوځ د راټولولو او خپل هیواد ته د ورستنولو په فکر کې دی.“
طالبانو د ټرمپ وروستیو ټویټونو په غبرګون کې چې ویلي یې دي،“ خپلې ټولې ژمنې به پوره کوي او له جګړه ځپلو هیوادونو به خپل ځواکونه راټولوو“ ویلي، دوی په لومړي سر کې هم د پرلپسي سرخلاصو لیکونو له لاري هم د ټرمپ او هم د امریکایی ولس د پوهولو کوښښ کړی و؛ خو څرنګه چې ټرمپ د خپلو ناکامو جګړه مارو جنرالانو تر اغیز لاندې راغی او د دوی په خوله یې د جګړې د غزولو او له طالب استازو سره د خبرو نه کولو پریکړه یې ټویټر ته ورکړه؛ همدا لامل دی چې نن ټرمپ د سرپه سترګو د خپلو لښکرو د ماتي ننداره په نژدې راتلونکي کې احساس کړي.
مقاله کې ویل شوي، د عسکرو د ورټولولو تر اعلان وړاندي ټرمپ په څرګندو ټکو خپلي ادارې ته لارښوونه وکړه چې له طالبانو سره مستقیمو مذاکراتو ته دې نور ګونډه ماته کړي.
طالبانو پر امریکا ژغ کړی چې، د ناکامې جګړې د غزولو پرځای باید د تفاهم له لاري له افغانستان څخه د امریکایی عسکرو د را ایستلو لاره پیدا کړي. چې دا کار یې هم د امریکا او هم زموږ د افغانان په ګټه دی.
