(کابل ټکی کام، ۱۳۹۷، سلواغه ۲۱)
د څېړنيز ژورناليزم بيرو په يوه راپور کې ويلي، چې د سي آی ای په لاس روزل شويو ځانګړيو قطعو یوازې په ننګرهار کې ۲۶۰ تنه ملکي وګړي وژلي دي.
په دغه راپور کې له سيمه ييزو قومي مشرانو او مدني فعالانو سره خبرې شوي چې د هغوی له خوا ورته ويل شوي چې دغه ملکي وګړي یوازې د تير کال په دو مياشتو (سپتمبر او اکتوبر) د عملیاتو پر مهال وژل شوي دي.
سرچينه وايي، دغه ځواکونه چې د (صفر یو، صفر دوه، صفر درې) قطعې بلل کېږي، د ننګرهار په هوايي ډګر کې پراته دي، د تورور ښیښو موټرونه او پرمختللې وسلې کاروي او هيڅوک يې يې پوښتنه نه شي کولای چې کوم ارګان پورې مربوط دي.
څيړنيز ژورناليزم بيرو ته قومي مشرانو او مديني فعالانو ويلي، که څه هم د يادو ځواکونو عملياتو کې زياته مرګ ژوبله اوښتې خو هغه چې یقيني دي تقريباً ۲۶۰ ملکيان يې وژلي دي.
راپور کې راغلي، دغه ځانګړې قطعې د عملياتو پر مهال نه د بمبارۍ پروا ساتي او نه هم د ملکي خلکو د وژل کېدو په اړه فکر کوي.
سرچينې ته يوه ملکي کس چې پر کور يې د يادو ځواکونو له خوا عمليات شوي ويلي، “لومړی يې راباندې بمونه وغورځول، وروسته په کور راننوتل او هرې خوا يې ناتاره ډزې وکړې، زما تره يې له خپل نهه کلن زوی سره وواژه او د کور نور کوچنيان او ميرمنې يې ټپيانې کړې”.
دغه راز د ننګرهار یو مديني فعال وايي، صفر دوه قطعه د عملياتو پر مهال د هيڅ ملکي د وژل کېدو پرواه نه ساتي، د خلکو کورونه ړنګوي، موټرونه يې په اور سوځوي، هوايي بريدونه کوي او په عملياتو کې چاوديدونکي توکي کاروي.
په افغانستان کې د بشري حقونو د څار د ادارې مشرې څېړونکې پاتريشا ګروسمن دغه شپني عمليات چې د امر ورکولو اصلي ځای يې نه دی معلوم او پکې ملکيان په نښه کې، دغه ډول عمليات غندلي وايي چې دوی يې په اړه اندېښمن دي.
د بیرو د راپور له مخې، تر اوسه څرګنده شوې نه ده چې د دغه ځواکونو د ورانکاريو په اړه چاته مراجعه وشي ځکه تر دې مخکې يوناما ويلي چې دغه ځانګړې قطعې د افغان ځواکونو له ليکو بهر دي او افغان حکومت ته هيڅ ډوال ځواب نه ورکوي.
دا په داسې حال کې ده، چې تيره ورځ هم ګډو ځواکونو چې ګمان کېږي په يادو قطعو پورې مربوط دي د هلمند په سنګين ولسوالۍ کې د عملياتو پر مهال لسګونه ملکي وګړي وژلي دي.
