(کابل ټکی کام ۱۳۹۷ کب ۶)
د سولې عالي شورا د دارالانشاء رئیس عمر داودزی وایي، له طالبانو به وغواړي چې په لویه مشورتي جرګه کې ګډون وکړي.
نوموړي ویلي ،لویې جرګې ته له طالبانو څخه رسمي غوښتنه د جرګې د اداري پلاوی صلاحيت دی او په دې هکله وروستۍ پریکړه به هم هغوی کوي.
داودزی وایي، د دې جرګې د جوړولو چارې به یو ټول شموله کمیسیون مخته وړي چې د مختلفو سیاسي ګوندونو او مدني ټولنو استازي به په کې ونډه ولري.
داودزی زیاتوي، په دغه جرګه کې به د ورستیو لاسته راوړنو په ټینګار او د حکومت او طالبانو ترمنځ د مذاکراتو د رسمي پیل لپاره تګلارې ټاکي.
نوموړي دغه راز وویل، دجرګې غړي به د نیمه انتخابي په شکل ټاکل کیږي چې په هر ولایت کې به یې غړي د محلي چارواکو د یوې کمیټې لخوا په ګوته کیږي.
دغه جرګه کې به تر ۲ زرو کسانو ګډون وکړي چې ۳۰ سلنه به یې میرمنې وي.
نوموړي وویل، په قطر کې د امریکا او طالبانو ترمنځ له خبرو هیله لري چې د طالبانو او امریکا تر منځ دغه مذاکرات به طالبان دې ته وهڅوي چې له افغان حکومت سره مخامخ خبرو ته کیني.
