(کابل ټکی کام ۱۳۹۷ کب ۶)
طالب او امریکایي چارواکو په ځانګړو پیغامونو کې د قطر سبانۍ غونډې ته امیدواري ښوودلې او دغه غونډه یې په ښه فال نیولې ده.
د افغان سولې لپاره د امریکا ځانګړي استازي زلمي خلیلزاد د غونډې په هکله څو ټویټونه کړي او ویلي یې دي چې اوس به طالبانو د یوه با صلاحیته ټيم سره خبري وکړي او دغه خبرې به په جدي توګه مخته ولاړې شي.
نوموړي په یوبل ټویټ کې ویلي،
“ له ملا عبدالغني برادر سره مي د لومړي ځل لپاره وکتل. د غرمي ډوډۍ مو سره وخوړله. اوس، او اوس د خبرو اطاق ته داخلېږو.“
بلخوا بیا د قطر د سیاسي دفتر ویاند سهیل شاهین له رسنیو سره په خبرو کې ویلي چې دغه غونډه به څلور ورځنۍ وي او ښایي نوره هم وغځیږي.
نوموړي ویلي، لومړۍ ورځ به دواړه خواوې یواځې پیژندنه سره وکړي او درۍ ورځې نور به د مذاکراتو پر اصلي اجنډا چې د بهرنیانو وتل او له افغانستانه امریکا ته د ګواښ نه پیښیدلو د تضمین ورکول دي، خبرې وکړي.
په ورته وخت کې طالب ویاند ذبیح الله مجاهد پر خپله ټویټرپاڼه لیکلي چې،
“نن د قطر هیواد لخوا د اسلامي امارت استازو ته میلمستیا سوي ده،نن زموږ او د امریکايي استازو تعرفي لیدنه کیږي؛ اصلي مذاکرات سبا شروع کیږي ان شاء الله.“
د طالبانو سرچینو رسنیو ته ویلي چې ملا برادر به په دغه غونډه کې یواځې د سر په خبرو کې ګډون کوي نور به د څارونکي په حیث وي او د غونډې ترپایه به ګډونوال نه وي.
د قطر په دغه غونډه کې به د طالبانو د ۱۴ کسیز مذاکراتي له غړو یواځې انس حقاني شتون ونه لري او دغه راز د امریکا له لوري د ګڼو دولتي ادرو او کانګرس ۲۵ تنه ګډونوال دي.
