(کابل ټکی کام، ۱۳۹۷، کب ۱۲)
نږدې يوه اوونۍ کېږي چې د قطر هېواد په مرکز دوحه کې د طالبانو او امریکايي استازو تر منځ د افغان سولې په تړاو خبرې روانې دي.
دغه خبرې د فبرورۍ مياشتې په ۲۵ نيټه پيل شوي چې تيره پنجشنبه او جمعه پکې وقفه راغلې ده.
په قطر کې د طالبانو د سياسي دفتر وياند سهيل شاهين او د امریکا د بهرنيو چارو وزارت ځانګړي استازي ويلي و، په خبرو کې پرمختګ شوی او دوه ورځې دواړو خواوو د سلامشورو لپاره وقفه کړې ده.
د طالبانو او امریکايي پلاوي تر منځ پرون د شنبې په ورځ يو ځل بيا خبرې پيل شوي چې د سرچينو په وينا ښايي له پرمختګ سره پای ته ورسېږي خو که د يادو اجنډواوو په اړه دواړه خواوې بشپړ توافق ته ونه رسېږي دغه خبرې د نورو څو ورځو لپاره هم غځېدلی شي.
د دغه خبرو اصلي اجنډا له افغانستانه د بهرنيو ځواکونو وتل او دا چې له افغانستان څخه به نورو هېوادونو ته ګواښ نه متوجه کېږي.
تر اوسه د دغه ناستې په اړه ډير جزيات نه دي ورکړل شوي خو خليلزاد له تيرې دوه ورځينۍ وقفې وروسته ويلي و چې په څلورو مسائلو بحث پاتې دی.
د نيويارک ټايمز خبريال مجيب مشال له قطر څخه په تازه راپور کې ليکلي، دواړه خواوې په خبرو کې محتاطانه خوشبين دي، موافقې ته سره نږدې شوي او ښايي د افغانستان اوولس کلنه جګړه پای ته ورسېږي.
