ولسمشر ټرمپ د ایراني ځواکونو ستاینه کړې او ولس یې هوښيار ګڼلي

کابل ټکی کام (شنبه، ۲۹، وری، ۱۴۰۵ل)
د امریکا ولسمشر ډونالډ ټرمپ په تازه څرګندونو کې ویلي، ایران یو ځواکمن او هوښیار هېواد دی او پیاوړي جنګیالي لري. هغه دا څرګندونې داسې مهال کړي چې مخکې یې د ایران پر وړاندې د فشار او ګواښ سیاستونه سختې نیوکې راپارولې وې.
بلخوا، د برازیل ولسمشر لوئیس ایناسیو لولا دا سیلوا د ټرمپ پر دې تګلارې توند غبرګون ښودلی. هغه ویلي، هېڅ مشر حق نه لري چې هره ورځ نور هېوادونه وګواښي.
لولا ټینګار کړی چې د امریکا اساسي قانون هم ولسمشر ته دا اجازه نه ورکوي چې د ګواښ ژبه وکاروي. نوموړي د اپرېل د ۷مې د ټرمپ څرګندونو ته په اشارې وویل، د هغه بهرنۍ تګلاره «خطرناکه لوبه» ده چې د امریکا پر پوځي او اقتصادي ځواک ولاړه ده.
هغه زیاته کړه، نړیوال مشران باید د وېرولو پر ځای د متقابل درناوي او سولې د پیاوړتیا لپاره کار وکړي.