ډاکټر یوسف اکبري
يرغلګر چې کله وغواړي يو هيواد خپله مستعمره وګرځوي نو تر ټولو د مخه د راتلونکي نسل اړیکې له ماضي سره پرې کوي په دې معنا چې د دغه ملت چې دوی اوس تسخير کړی دی، د دې ملت دين، عنعنات، معتقدات، ملي ارزښتونه، وسله والې جګړې، وياړونه د اوسني او راتلونکي نسل نه هيرکړي .
دا ځکه چې د کمزورئ پر مهال هر ملت خپل ماضي ته سر ورښکاره کوي، د بیلګې په توګه که اسلامي امت ذکر کړو نو دوي تل خپل ماضي ته د رجوع لپاره د الله تعالی ویناوې او د رسول الله صلی الله عليه وسلم سيرت، د صحابه کرامو او قائدينو تاريخ ته نظر اچوي چې په هغې کې د هغوی لاسته راوړنې او فتوحات څومره او څه ډول دي، نو طبيعي خبره ده چې د اجدادو دا ډول لاسته راوړنې يو مسلمان ته خورا زيات همت وربخښي، دوی هڅه کوي چې د هغوی په څير ځانونه هم عيار کړي، کله چې مسلمانان د خپلو اسلافو په معنوي قوت عيار شي نو طبيعي خبره ده چې د هغوی پر ضد پاڅون شکل نیسي او د استعمارګرانو شومې موخې له خاورو سره خاورې کوي، نو ځکه استعمارګران د مسلمانانو رابطې د هغوی له ماضي سره پرې کوي او دا هر څه د تاریخ په کتابونو کې په وضاحت سره وجود لري.
کوم هيوادونه چې د روسانو مستعمره ؤ لکه ازبکستان، تاجکستان، قزاقستان، آزربايجان او داسې نور… په لومړي قدم کې يې د دوی ليک دود ( ا ، ب ) يې ور بدل کړل، ځکه چې په دې خاوره کې د امام بخاري رح په څیر سترې دیني علمي هستۍ تيرې شوي دي، فتوحات تر سره شوي دي او پدې خاوره کې ستر اسلامي تمدن پروت و، دا ناممکنه خبره ده چې د اسلامي تمدن کتابونه دې موجود وي او خلک دې پرې پوهيږي هم او له دې سره سره دې د استعمارګرانو د استعمار تر چتر لاندې ژوند هم وکړي !
د اسلامي امت دا ستر تمدن په کتابونو کې په دوه ژبو کې ژوندی پروت و، فارسي او عربي ، د دې دواړو ژبو رسم الخط تقريبا يو ډول دی، څوک چې په عربي ژبه پوهيږي نو په اسانۍسره فارسي ژبه هم زده کولی شي او څوک چې په فارسي پوهيږي هغه په اسانه عربي زده کولی شي، ځکه چی ۶۰٪ سلنه الفاظ د فارسي له عربي ژبې نه مستعار شوي دي، لکه طبيب، وريدونه، شيريانونه، شعر، نثر، قافيه، بيعه، شراء، اجاره او داسې نور.
کله چې کمونستانو د ( ۱۹۱۷ نه تر ۱۹۲۱ ) پورې په منځینۍ آسیا کې خپل استعمار حاکم کړ نو تر ټولو لومړی يې پدې سيمو کې فارسي او عربي دواړه ژبې منعه اعلان کړې، پدې ژبو کې کتاب درلودل يې جرم وګرځاو، په مليونونو کتابونه يې د اور خاشاک وګرځول او داسې قانون جوړ شو چې له دې وروسته به خط په لاتيني ليک دود ليکل کيږي نه فارسي او بله ژبه، هر چا به چې له دې قانون نه سرغړونه کوله نو زندان ته به استول کیده او تر ډول ډول شکنجو لاندې به نیول کیده.
بالآخره ورو- ورو دغه قانون عملي شو، ورځپاڼې په لاتيني، ښوونځي په لاتيني او بالآخر هر څه په لاتيني ژبو شروع شول، نو د ۱۹۲۱ نه تر ۱۹۴۱ کاله پورې چې په دغو مستعمره شویو هیوادونو کې څومره نوی نسل موجود و، دا يو هم نور په فارسي او عربي ژبو نه پوهيدل، د ۱۹۴۱ نه وروسته په کلي ډول روسي ژبه مروجه شوه، د دې ګټه کمونستانو ته دا په لاس ورغله چې هر هغه کتاب يا کومه بله لیکنه چې د کمونیزم، الحاد،، بی لارۍ او فساد او افساد لپاره وه، هر چا ترې په آسانۍ سره استفاده کولای شوه او هر هغه کتاب چې چا ته يې اسلام ورزده کاوو لومړی خو نه موندل کیدو او که به وموندل شو نو څوک به پرې نه پوهيدل، د مثال په ډول که زه همدا ليکنه په پښتو وليکم خو رسم الخط يې لاتيني يا روسي وي نو آيا څوک به پرې پوه شي؟ سره له دې چې تاسو په پښتو ژبه پوهيږئ، هیڅکله به پرې پوه نشئ، نو کله چې يو شخص په خپله ژبه پوه نشي دا ثابته خبره ده چې د خپل ماضي سره به يې اړیکې پرې او د يرغلګرو په مکر به د فنا په لور تهدیدیږي، بالآخره دغه قشر په لاعلمۍ سره د کمونستانو او يرغلګرو په پښو ګامونه اخیستل پیل کړل او د هغوی لارښوونې يې پرته له تعقل منلې او د کمونستانو سره یې په اخلاص او صداقت سره خپل نوی ژوند پیل کړ د هغوی سره به نور اوګه په اوګه په نورو هيوادونو کې د اتحاد جماهير روسيه لپاره د جنګونو او سرښندنو لپاره په خوښۍ سره تلل.
دا هغه تګلاره وه چې کمونستانو خپله کړې وه، او یواځې یې د محکومو او مستضعفو هیوادونو د وګړو د ژبې په له منځه وړلو سره یې غوښتل خپل شوم هدف ته ورسیږي.
له بلې خوا د دې شومې پدیدې تر څنګ د مسلمانانو پر خلاف منفي تبلیغات هم روان ساتي لکه نن سبا چې د امریکا او طالبانو تر مینځ له یوې خوا د سولې مذاکرات روان دي او له بلې خوا د طالبانو پر خلاف له زهرو ډک تبلیغات پر مخ بیایي.
اوس زمونږ په هيواد کې پخواني بقایا ملحدين + غربي سیکولرستان او د همفکرۍ په اصطلاح روڼ اندي خو په اصل کې ړوند اندي په نوم افغانان پدې هڅه کې دي چې پښتو له منځه يوسي، او مونږ هم د منځینۍ آسیا د مسلمانانو په څير په تدریجي توګه له مینځه یوسي او پوپناه مو کړي. نو ځکه د تودې جګړې تر څنګ دغه سړه جګړه چې رواني جګړه هم ورته ویلای شو روانه وساتي.
