ليکوال: غورځنګ
امريکا او طالبان تقريباً له اتلس کلنې جګړې وروسته نږدې تېر کال د مذاکراتو پر مېز سره کېناستل، د دې دواړو تر منځ مختلفې ناستې تر سره شوې چې هر څوک يې پايلې د ځان لپاره ګټورې بولي، خو تقريباً له پنځو ناستو وروسته لا هم دواړه خواوې نتيجې ته نه دي رسېدلي او خلک هم دې ته په تمه دي چې ګډه اعلاميه به کله نشرېږي يا هم د سولې عملي اقدام به کله تر سره کېږي؟
د عامو خلکو ذهنيتونه خو يوازې د سولې په اړه وي او وايي چې خدای دې سوله وکړي تر څو امن او امان راشي، د هر چا سر او مال خوندي وي، يو بل ته ضرر ونه رسول شي او مرګونه او بې ځايه وژنې ودرول شي.
مګر سوله بيا ډېر ژور مفاهيم لري. خو دلته به يې په دې خبرې وکړو چې د قطر د دفتر خبرې اترې يا هم سوله ييز مذاکرات ولې ځنډېږي؟
د قطر په دفتر کې چې کومې خبرې اترې روانې دي اوږدې او پېچلي دي خو شايد نورې هم پېچلې شي، د دې لپاره چې دا خبرې اهمې او پېچلې دي نو طالبانو هم خپله نيمه رهبري شورا هم د دغو خبرو لپاره په ګډون کوونکي پلاوي کې شامله کړه، همداشان امريکايي استازي هم د زلمي خليلزاد په مشرۍ هرې خواته سفرونه پيل کړي دي او د هرې غونډې لپاره ځانته ځانته تياری کوي، دغه رنګه له هرې غونډې وروسته دواړه لوري استازي خپلو مشرانو ته د تر سره شوې غونډې جريان وايي. تر څو له خپلو مشرانو څخه مستقيم هدايات واخلي.
په دې غونډو کې که څه هم د امريکايانو د وتلو خبره تر ټولو مهمه خبره ده او د غربيانو لپاره بيا سره کرښه له ائينده افغانستان څخه د امريکا او نورې اروپا ته د ګواښ نه پېښول دي، خو د دې تر څنګ يوه بله مهمه موضوع د افغانستان لپاره د اسلامي نظام په رسميت پېژندل دي، ووځي. نو خبره د ائينده افغانستان وه چې د افغانستان راتلونکی اسلامي نظام بايد امريکا، ملګري ملتونه او نوره نړۍ په رسمياتو وپېژني او بيا به څوک هم پرې اعتراض نه کوي، همداشان له افغانستان سره د نورو هېوادونو راتلونکې اړيکې هم په دې غونډه کې مطرح کېږي چې په دې اړه بايد امريکا هېڅ کار ونه لري يعنې د افغانستان راتلونکی اسلامي نظام په هر اړخ کې خپلواک وي او هېڅ ډول خطر به ورته نه پېښېږي.
همداشان دا هم ويل کېږي چې په دغو غونډو کې به د ترورېزم تعريف او پېژند هم معلوم شي. ځکه چې اصلاً کوم څه چې امريکا يې ترورېزم نوموي هغه په اصل کې د خپل دين، هېواد او ملي نواميسو دفاع ده چې دا د هر انسان مسلم حق دی. مګر د دې بر عکس امريکا په خپله په ترورېزم اخته ده او هغه اعمال چې په اسلامي نړۍ کې يې امریکا او نور اروپايان تر سره کوي په اصل کې د ترورېزم عملونه دي.
نو که د ترورېزم تعريف حقيقي معنا ومومي، کېدای شي چې نور د اروپا او امريکا لاسونه له اسلامي ممالکو څخه لنډ شي.
نو د دې لپاره چې موضوعات ډېر پېچلي او مغلق وو، د دې لپاره روانې غونډې هم د وخت له اړخه اوږدې او د موضوعاتو له مخې پېچلې وي، او کېدای شي دغه پېچلوالی يې نور هم دوام ومومي.
