ليکوال: غورځنګ
افغانان يو داسې قوم دی چې په خپل دين، هېواد، ملي ارزښتونو، ملي نواميسو او نورو معنوياتو او مقدساتو په باره کې تر بل هر قوم په قربانۍ کې مخينه لري، چې دغه وياړونه او له دغو وياړونو کلکه دفاع او ساتنه يې د دې لامل شوې چې هر يرغلګر په کې ماتې خوري. او دې قوم ته هېڅ يرغلګر نشي ټينګېدلی، خو په دې وروستيو کې ډېر زيات وکړېدلو، د برتانيې له يرغل څخه يې څولسيزې لا ارام او سکون نه و کړی چې له بل سره ښکېلاک او يرغل سره مخ شول، د سره ښکېلاک او يرغل پواسطه افغانانو ډېرې ناخوالې وليدلې چې د هغو له جملې څخه يې نږدې يونيم ميليون وګړي په شهادت ورسېدل او په همدومره شمېر يې نورو هېوادونو ته مهاجر شول چې دا دی تر اوسه هم په پرديو هېوادونو کې د هجرت شپې او ورځې تېروي.
د روسانو له يرغل څخه وروسته چې کله د پاټک سالارۍ دور پيل شو نو هم افغانان ډېر زيات وکړول شول، چې په هره لويه لاره به د پاټکيانو له لوري پاټک اچول شوی وو او په افغانانو به يې بېلابېل ظلمونه او وحشتونه کول، خو لنډه دا چې دغه پاټکيان هم هغه وخت ختم شول کله چې له کندهار څخه يو بزرګ او ملا صاحب راپاڅېد او د خپلو څو تنو طالبانو په ملتيا يې د پاټکيانو پر ضد وسله واخيستله او لومړی يې کندهار او بیا وروسته قدم په قدم ټول افغانستان له ټولو ظلمونو او ناخوالو وژغورلو، دغه ملا صاحب د پنځو کلونو لپاره افغانان د اسلامي نظام تر سيوري لاندې سره راټول کړل او ايله بيله يې خپلو تېرو هيلو ته ورسول.
خو د کفري او غربي نړۍ بيا اسلامي نظام کله په مسلمانانو پيرزو کېږي، نو د همدې تاريخي او شوم عادت له مخې يې دا ځل د خوارو افغانانو پر وړاندې تقريباً يو داسې يرغل وکړلو چې د نړۍ په تاريخ کې کم ساری لري، تقريباً د پنځوسو په شا او خوا هېوادونه يې سره متحد کړل او په ډېر تعصب او پوره زور سره يې په افغانستان ناځوانمردانه حمله وکړه، او پوره اتلس کاله يې د دې ځپلي ملت وينې وڅښلې او پر ګران هېواد يې يوه داسې اداره مسلطه کړله چې له هره اړخه بې واکه ده خو يوازې د خپلو افغانانو په وژلو کې بيا پوره واک او اختيار لري.
نو ویلی شو چې سوله د افغانانو څلوېښت کلن ارمان او هيله ده، ځکه نو افغانان تر بل هر قوم سولې ته ډېر زيات لېوال او اړ دي.
افغانانو په تېرو اتلسو کلونو کې هم د جګړې له دواړو خواوو څخه غوښتي چې سوله وکړي تر څو افغانان خپل يوازېني ارمان ته ورسېږي خو دا چې د کابل رژيم به تل د رسنيو پر مټ ويل چې طالبان سوله نه کوي او جګړه خوښوي، خو دا دی اوس ټولو افغانانو بلکې نړۍ ته د لمر په څېر روښانه شوه چې څوک سولې ته ژمن دی؟ څوک د ملت غمخور دی؟ له چا سره د ملت د کونډو او رنډو غم او اندېښنه ده؟ څوک د ملت د وينو ګټونکي دي؟
نو په پای کې بايد ووايو چې د افغانانو دغې څلوېښت کلنې هيلې ته، که الله ج کول؛ نو ډېر لږ وخت پاتې دی، ان شاء الله ژر به که خير و، يو رښتينې سوله او اسلامي نظام راشي او افغانان به بيا د ورورۍ په ټغر سره کېني، افغانان به لکه د نورو قومونو په څېر خپل پاتې ژوند ته ادامه ورکړي، خپل پاتې ژوند به په خير او خيريت سره تېروي.
نو له الله ج څخه زه پخپله هم د يوه مسلمان افغان په حيث دا سوال کووم چې افغان په ريښتينې سوله ونازوي او دغه انقلاب نور پای ته ورسوي، تر څو افغانان د خپل ولس خدمت وکړي او خپل ولس له نورو ولسونو سره سيال کړي.
