سيګار: د نشه يي موادو سره مبارزه کې نهه ميليارده ډالر لګيدلي؛ هيڅ ګټه يې نه ده کړې
(کابل ټکی کام، ۱۳۹۸، وری ۲۴)
د افغانستان د بيارغونې لپاره د امريکايي مرستو د څار اداره “سيګار” وايي، په افغانستان کې د نشه يي موادو سره پر مبارزې ميلياردونه ډالره لګيدلي خو هيڅ مؤثره ګټه يې نه ده لرلې.
د سيګار مشر جان سوپکو دغه څرګندونې د امريکا د مشرانو جرګې د امنيتي چارو کمېټې غونډې ته کړي.
سپوپکو په روان کال کې د کوکنارو د کښت د ډيروالي خبر ورکړی زياتوي، په دغه برخه کې د افغانستان او د امريکا متحده ایالاتو په لاره اچول شوی پروګرام بريالی نه و.
سوپکو ويلي، تير کال چې کوکنارو کښت کم و ستر لامل يې وچکالي وه خو سږ کال چې کال اباد دی نو ورسره به په افغانستان کې د کوکنارو کښت هم زيات شي.
هغه ويلي، په افغانستان کې له نشه يي موادو سره د مبارزې په برخه کې یو پروګرام هم ګټور نه و ، له پيله تر دې دمه نهه ميليارده امريکايي ډالره د نشه يي موادو سره پر مبارزې لګيدلي خو زياتوي ( په تېرو لسو کالو کې د کوکنارو د کښت اړولو پروګرامونو له لارې په کال کې یوازې په سلو کې پنځه کرل شوي کوکنار اړولي دي).
تر دې مخکې داسې راپورونه ورکړل شوي چې د نشه يي موادو سره د مبارزې اړوند ادارو د کوکنارو کښت اړولو يا د دغه بوټي د بديل عامولو په برخه کې کافي اندازه کار نه دی کړی او په افغانستان کې ميشت بهرنيان او دولتي لوړپوړي چارواکي د افيمو، پوډرو او نشه يي توکو په قاچاق کې لاس لري، له دې لارې ميليونونه پيسې ترلاسه کوي نه غواړي چې له يوې مخې په افغانستان کې د کوکنارو کښت بند شي.
طالبانو د خپلې واکمنۍ پر مهال په ټول هيواد کې د کوکنارو کښت بند کړی و خو هيواد ته د بهرنيانو په راتګ او د نوي حکومت په جوړيدو يوځل بيا د دغه بوټي کرل او قاچاق زيات شوی چې له کبله يې لکونه افغانان معتاد شوي دي.
