ولایتي چارواکي: د زابل دایچوپان ولسوالۍ د سقوط له ګواښ سره مخ ده
د زابل ولایت چارواکي وایي چې د دې ولایت دايچوپان ولسوالۍ د سقوط له ګواښ سره مخ ده
د دې ولایت د ولایتي شوری غړي عطاجان حقبیان امریکا غږ ته ویلي چې که اضافي سرتیري دې ولسوالۍ ته ونه لیږل شي، ولسوالۍ به د طالبانو لاس ته ولویږي
د حقبیان په خبره چې د ولسوالۍ د مرکزي ودانۍ امنیتي کمربند مات شوی او امنیتي ځواکونو ټولې پوستې پریښي دي
د طالبانو ویاند قاري یوسف احمدي په خپل ټویټر لیکي چې د دایچوپان ولسوالۍ ۳ پوستې د دوی د ملګرو لاس ته ورغلي دي
احمدي عسکرو ته د مرګ ژوبلې د ادعا ترڅنګ د مهماتو د نیولو خبر هم ورکوي
د زابل د والي ویاند هم په دایچوپان ولسوالۍ کې د جګړې تائید کوي او وایي چې تلفات هم اوښتي دي
دواړه خواوو تر اوسه د تلفاتو په اړه دقیق معلومات نه دي خپاره کړي
دا په داسې حال کې ده چې وړمه ورځ طالبانو خپل نوي پسرلني عملیات د الفتح په نوم اعلان کړل
د هیواد په اکثره ولایتونو کې طالبانو خپلو بریدونو ته د عملیاتو له اعلانیدو وروسته زیات زور ورکړی دی.
