د راتلونکې میاشتې “غبرګولې” په لومړۍ نیټه د ملي وحدت حکومت قانوني موده ختمیږي
سترې محکمې نن د یوه فرمان له مخې د ولسمشر غني د واک موده د نوي ولسمشر تر ټاکل کیدو پورې وغځوله
اجرایه ریاست هم د سترې محکمې له دې پرېکړې وروسته خبر ورکړی چې د ملي یووالي حکومت به د نوي ولسمشر تر ټاکل کیدو پورې خپل کار ته دوام ورکوي
وړاندې تر دې د ولسمشریزو ټاکنو نوماندانو د یوې ګډې اعلامیې په خپرولو سره ویلي وو چې د غبرګولې له لومړۍ نیټې سره سم د حکومت مشروعیت ختمیږي او باید د حکومت مشران دې مسئلې ته متوجه شي
نوماندانو د سترې محکمې له دې پرېکړې مخکې لا ویلي و، چې د دوی د معلوماتو له مخې حکومت په ستره محکمه فشار راوړی ترڅو حکومت ته مشروعیت ورکړي
دوی په عدلي او قضایي ارګانونو هم غږ کړی وو چې خپله خپلواکي او ازادي دې بې داغه وساتي او په دې حساسو شرائطو کې باید خپل مسؤلیت ادا کړي
