کابل ټکی کام ( دوشنبه، ۲ غوايی ، ۱۳۹۸ل)
یوې باوري سرچینې بعضو رسنیو ته ویلي، داسې هڅې روانې دي چې یو شمېر نورو هېوادونو کې هم طالبانو ته دفترونه پرانستل شي، او په دې توګه به د سولې خبرې پراخې شي.
سرچینو بي بي سي ته ویلي، اندونیزیا، برونای او ازبکستان په خپلو خاورو کې طالبانو ته د دفتر د پرانیستلو وړاندیز کړی دی.
دغه سرچینه وایي چې دغه خبرې تر اوسه یوازې د بحثونو په کچه دي.
د سرچینې په باور، لومړنۍ بین الافغاني ناسته به قطر کې کیږي او تمه ده دویمه به د ازبکستان په سمر قند ښار کې چې اسلامي ارزښت هم لري، ترسره شي.
تېره اونۍ د کډ دولت دمشر محمد اشرف غني ستر سلاکار فضل محمود فضلي هم له بي بي سي سره په خبرو کې ویلي وو، ښه به دا وي چې د سولې خبرې د قطر پر ځای کوم بل هېواد کې وشي.
دا په داسې حال کې ده چې طالبانو ویلي، دوه ورځې وړاندې یې دوحه کې له یوشمیر بهر میشتو افغانانو سره غونډه کړې ده.
طالبانو په دغې غونډه کې د دوی د مرکچي پلاوي د یوه غړي امیرخان متقي خبرې خپرې کړي چې نوموړی په کې د قطر غونډې د لغوه کېدو پړه پر ګډ حکومت اچوي.
د ده په وینا، د دوحې کنفرانس د ګډونوالو هغه لېست چې افغان حکومت چمتو کړی و، له دوه اړخیزې هوکړې سره په ټکر کې وه.
د طالبانو د مرکچي پلاوي غړي امیر خان متقي زیاته کړې، تر هغو چې له امریکایانو سره د دوی خبرې وروستۍ نه شي، د دګډ حکومت له استازو سره خبرې نه کوي.
یادونه باید وکړو چې دافغانستان دقضیې دحل لپاره دامریکا ځانګړي استازي زلمي خلیلزاد نن خپل اووم سفر پېل کړ، له دې سره سم دطالبانو دسیاسي دفتر ویاند سهېل شاهین له یوشمېر بهرنیو رسنیو سره په خبرو کې دراتلونکې ناستې اجنډا دخارجي ځواکونو د وتلو موده ښودلې.
