(کابل ټکی کام، ۱۳۹۸، غویی ۳)
په وروستيو کې يو ځل بيا د هيواد په بيلابيلو ولايتونو کې د ګډو ځواکونو په عملياتو کې ملکي خلکو ته مالي او ځاني زيانونه اوښتي چې طالبانو پرې خواشيني څرګنده کړې ده.
طالبانو د ورځې خبره تر عنوان لاندې په یوه مطلب کې چې د دوی رسمي نظر څرګندوي ليکي، یرغلګرو او د کابل رژيم تل د بې دفاع ملکيانو وژلو ته لومړيتوب ورکړی او په وروستيو کې دغه لړۍ تونده شوې، د ملکي خلکو وژلو او کور ورانولو ته يې کار ويلي دی.
په مطلب کې راغلي، دښمن تل د ملکي تلفاتو څخه انکار کوي او که پر کومه پيښه له مجبورۍ اعتراف وکړي نو بيا يې پړه پر طالبانو اچوي چې ګواکې له یادې سيمې پر عسکرو ډزې وشوې او په ځوابي ډزو کې ملکيان وژل شوي.
خو طالبان وايي، د ملکي تلفاتو وروستۍ پيښې هغه سيمو کې رامنځته شوي چې نه طالبانو پکې شتون درلود او نه يې پر دښمن ډزې کړي.
مطلب زياتوي، دښمن له مجاهدينو سره د مخامخ کيدو توان نه لري نو ځکه د خپلې مرګ ژوبلې انتقام له اوولس څخه اخلي.
په مطلب کې د ملکي خلکو د تلفاتو په اړه د چارواکو چوپتيا ته اشاره شوې زياتوي: “کابل رژیم چې ځان منتخب حکومت ګڼي خپل هیواد کې دملکي تلفاتو پر پیښو هیڅ ډول غبرګون نه ښیې،خو که امریکا او اروپا کې یو کس په ترافیکي او طبعي پیښه کې مړ شي نو بیاغربيانو ته په پرله پسې ډول دتسلیت پیغامونه مخابره کوي.)
په وروستيو کې د ګډو ځواکونو په شپنيو عملياتو، بمباريو او ډرون بريدونو کې تر ډيره ملکي خلک په نښه شوي او لا هم دغه لړۍ روانه ده، چې تر دې دمه د ګډ حکومت د چارواکو تر څنګ د بشري بنسټونو ادارو هم د ملکي تلفاتو د مخنیوي په اړه لازم اقدامات نه دي کړي.
تيره ورځ په افغانستان کې دناټو ځواکونو عمومي قوماندان سکاټ ميلر هم د ګډو ځواکونو په عملياتو کې په ملکي مرګ ژوبلې خواشيني څرګنده کړې وه او ويلي يې و چې دوی به هڅې وکړي چې په عملياتو کې ملکي تلفات کم شي.
