سعودي عربستان د ترهګرۍ په تور ۳۷ سعوديان اعدام کړل
(کابل ټکی کام ۱۳۹۸، غویی ۴)
د سعودي رسمي خبري اژانس د کورنيو چارو وزارت له قوله خبر ورکړی چې په دغه هيواد کې پرون د سې شنبې په ورځ د ترهګرۍ په تور ۳۷ سعودي وګړي اعدام شوي دي.
د سرچينې په وينا، دغه کسان په رياض، مکه، مدينه، قصيم او عسير کې اعدام شوي دي چې له پخوا په زندانونوکې و او په ترهګريزو کړنو تورن شوي و.
د کورنيو چارو وزارت په خپره کړې خبرپاڼه کې راغلي، تورنو کسانو په چاودنو، وسله والو بريدونو او د امنیتي ځواکونو په وژلو کې لاس درلود.
د سعودي رسمي خبري اژانس د معلوماتې له مخې، په دغه هیواد کې د روان کال له پيله تر دې دمه سل کسان اعدام شوي دي.
په وروستيو کې سعودي عربستان علماء، اسلامپال او ډيری سعوديان د دې لپاره زندانونو ته اچولي چې د دغه هيواد په غير شرعي کړنو به يې انتقادونه کول چې زياتره يې په زندانونو کې له سختو شکنجو او بد حالت سره مخ دي.
