زلمی خلیلزاد اسلام اباد ته روان شوی
کابل ټکی کام ( یکشنبه، ۸ غوايي ، ۱۳۹۸ل)
د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد له کابل څخه اسلام اباد ته تللی دی.
د پاکستان د باندینیو چارو وزارت هم دا خبر تائید کړی او ویلي یې دي چې خلیلزاد به د خپل دې سفر په ترڅ کې د لومړي وزیر عمران خان او له یو شمیر نورو چارواکو سره وګوري.
له خلیلزاد سره به په اسلام اباد کې د امریکا د بهرنیو چارو وزارت مخکښه مرستیاله او د جنوبي او مرکزي اسیا لپاره ځانګړې استازې الیس ویلز هم وي او له پاکستاني چارواکو سره به د افغان سولې په اړه بحث وکړي.
خلیلزاد په داسې وخت کې اسلام اباد ته تللی چې په کابل کې یې د ولسمشر غني او اجرائیه رئیس په ګډون له ځینو نورو چارواکو سره هم لیده کاته کړي دي.
زلمی خلیلزاد د افغان سولې په اړه سیمې ته په شپږم سفر بوخت دی چې په دې لړ کې به په قطر کې له طالبانو سره هم یو ځل بیا خبرو ته کیني.
