کابل ټکی کام (یکشنبه، مرغومی ۲۰مه، ۱۳۹۴ ل): نن د مرغومي په ۲۰ افغان کرکټ ملي لوبډلې د زمبابوې پر وړاندې د دوه شل اوریزو سیالیو لړۍ هم په پوره بریالیتوب سره خپله ګړه .
د افغانستان کرکټ بورډ په کوربه توب په متحده عربي اماراتو کې د افغانستان او زمبابوې ملي لوبډلو ترمنځ د کرکټ ۵ نړیوالو یوورځینیو سیالیو سربیره د ۲ نړیوالو شل اوریزو سیالیو لړۍ هم د افغان کرکټ ملي لوبډلې په تاریخي بریا سره پای ته ورسیده.
د نننۍ لوبې پچه د زمبابوې لوبډلمشر وګټله او افغان لوبډله یې توپوهنې ته راوبلله.
افغان ملي لوبډلې د سیالۍ په ټولو شلو اورونو کې د ۵ لوبغاړو په سوځیدو سره زمبابوې ملي لوبډلې ته د ۲۱۶ منډو هدف ورکړ چې له ډلې یې شهزاد محمدي ۱۱۸ ناسوځیدلې منډې جوړې کړې.
زمبابوې لوبډلې ورکړل شوی هدف ترلاسه نه کړای شو او د سیالۍ په نولسم اوور کې یې د ټولو لوبغاړو په سوځیدو سره ۱۳۴ منډې جوړې او لوبه یې د ۸۱ منډو په تفاوت سره د افغان لوبډلې په بریا سره پای ته ورسوله.
دغې تاریخي لوبې لپاره ګڼ شمېر افغانان ورغلي وه چې له نژدې نه يې ننداره کوله .
د افغان توپ اچونکو له لوري دولت ځدراڼ ۲، امیرحمزه هوتک ۲، سید شیرزاد ۲، محمد نبي عیسی خیل ۱ او راشد ارمان هم ۱ لوبغاړی وسوځاوه.
شهزاد محمدي د سیالۍ غوره لوبغاړی وټاکل شو او د نن ورځې له زړورې لوبې سره یې په نړیوال شل اوریز فارمټ سیالیو کې د ۱۰۰۰ منډو جوړلو ریکارډ ثبت کړ.
بدرالدین ځواك
