کابل ټکی کام ( پنجشنبه، ۱۲ غوايي ، ۱۳۹۸ل)
د پاکستان خیبرپښتونخوا په نوښار سیمه کې د پولیسو یو افسر د نامعلومو کسانو له خوا تر تښتول کېدو وروسته وژل شوی او مړی یې په هدیره کې غورځول شوی دی.
د نوښار سیمې د پولیسو مشر رسنیو سره خبرو کې د دې پېښې پخلی کړی او ویلي یې دي چې وژل شوی افسر یار محمد نومېده او لس ورځې وړاندې خپل کور ته په رخصتۍ راغلی و.
تر اوسه د یادې پېښې پړه کومې وسله والې ډلې پر غاړه نه ده اخیستې خو وړاندې تر دې د ورته ډېرو پېښو مسوولیت د پاکستاني طالبانو تحریک منلی دی.
داپه داسې حال کې ده چې تیره ورځ ډیورنډ کرښې ته څېرمه په پاکستاني ځواکونو یو برید شوی وو، چې په نتیجه کې یې لس تنه پوځیانو ته مرګ ژوبله اوښتې وه، او پړه یې پاکستاني وسلوالې ډلې حزب الاحرار پر غاړه اخیستې وه.
لیکن ددې پیښې مسئولیت تراوسه چاندی منلی.
