کابل ټکی کام ( سه شنبه، ۱۷ غوايي ، ۱۳۹۸ل)
د افغان قضیې دسیاسي حل لپاره د امریکا ځانګړي استازي زلمي خلیلزاد ټولو افغانانو ته د روژې د را رسېدو له امله مبارکي ویلې ده. نوموړي ویلي هیله لري چې د روژې په برکت افغانان له اوږدې او خونړۍ جګړې را ووځي.
دده په خبره اوس ددې وخت دی چې افغانان سره کېني او ستونزې د خبرو له لارې حل کړي. زلمي خلیلزاد همدا راز ویلي چې افغانان دې د روژې په درناوي له جګړو لاس واخلي او له یو بل سره دې د مخامخ خبرو پر مټ شته ستونزې حل کړي.
زلمی خلیلزاد تېره ورځ هند ته تللی و او ښایي نن بېرته په دوحه کې له طالبانو سره مخامخ خبرې پيل کړي.
نوموړي دتېرې پنجشنبې په ورځ دطالبانو سیاسي مذاکراتي ټیم سره په قطر کې شپږم پړاو مذاکرات پیل کړل چې ددوو ورځو رخصتۍ وروسته شاید نن بیا سره جرګه شي.
سیاسي څېړونکي او دمذاکراتو غړي داځل خوشبین دي، اودبعضو توافقاتو هیله څرګندوي.
دالامالومه نده چې دا پړاو مذاکرات به ترکومه وخته پوري دوام وکړي.
دطالبانو دسیاسي دفتر ویاند امریکایي ټیم ته په خپله ټوېټر پاڼه د ورځې دمذاکراتو رسمي وخت له سهار لسو دماسپښین تر دریوو بجو ټاکلی دی.
