کابل ټکی کام ( سه شنبه، ۱۷ غوايي ، ۱۳۹۸ل)
د ننګرهار ولایت دولتي ملایان وايي، حکومت دې په دغه ولایت کې د هدفي وژنو مخه ونیسي. د ننګرهار ولایت د حج او اوقافو رییس محمد داوود مجاهد وايي په دې وروستیو کې په دغه ولایت کې هدفي وژنې ډېرې شوې دي.
دده به خبره په تېرو څو ورځو کې شپږ علماء په هدفي وژنو کې وژل شوي. دې ملایانو له رسنیو سره په خبرو کې ویلي، چې سختدریځې ډلې دوی له حکومت د ملاتړ په خاطر وژني نو حکومت ته په کار ده، چې ددغه لړۍ مخنیوی وکړي.
د ننګرهار ځایي چارواکي وایي په دې اړه یې اړین تدابیر نیولي دي. د ننګرهار د والي ویاند عطا الله خوګیاڼی وايي امنیتي ادارې په دې برخه کې خپل فعالیتونه کوي او اړین تدابیر یې نیولي دي. دده په وینا دیني علما دې له خپلو ممبرونو روانه افغان وژنه وغندي او په دې برخه کې دې له حکومت سره همکاري وکړي.
داپه داسې حال کې ده چې څو ورځې وړاندې دننګرهار په لرې پرتو ولسوالیو کې څو دیني علماء په امریکايي بمبار کې ووژل شول.
همدارنګه یوشمېر علماء خپلو مدارسو ته دتګ په حال کې ووژل شول، لیکن دهغې په اړه نه چا دامنیت غوښتنه وکړه، اونه چا ورته دتدابیرو ډاډ ورکړ.
