بادغيس: طالبانو د کومانډو عسکرو پوځي مرکز نيولی؛ شل عسکر وژل شوي
(کابل ټکی کام، ۱۳۹۸، غویی ۲۰)
د بادغيس ولايت په مرغاب ولسوالۍ کې طالبانو د دولتي ځواکونو په يوه مرکز بريد کړی چې په وينا يې دوه ديرش تنه کومانډو عسکرو ته يې مرګ ژوبله اړولې ده.
دغه عملیات تيره شپه د يادې ولسوالۍ په اکازو سيمه کې د طالبانو د ځانګړي ځواک له خوا چې وخت ناوخت د دولتي عسکرو په مهمو پوځي مرکزونو پريکنده عملیات کوي ترسره شوي دي.
طالب وياند یوسف احمدي کابل ټکی کام ته په راليږلې خبرپاڼه کې ويلي، د حملې پر مهال یاد پوځي مرکز طالبانو نيولی او د ټولي د قومندان حميدالله شرابي په شمول شل تنه کومانډو عسکر ځای پر ځای وژل شوي چې جسدونه يې د جګړې پر ځای پراته دي زياتوي دوولس عسکر په ټپي حالت کې تښتيدلي دي.
اوولس ميله بيلابيل ډوله وسلې، څلور د شپې دروبينان ، پنځه کوچنۍ مخابرې او په زیاته اندازه مهمات د طالبانو لاسته ورغلي دي.
طالبانو د نوي کال پسرلنيو (الفتح) عملياتو له پيل راهيسې د هيواد په بيلابيلو ولايتونو کې په دولتي عسکرو، چارواکو، پوځي مرکزونو او د بهرنيو ځواکونو په مرکزونو خپلو حملو ته زور ورکړی او ورځ تر بلې د خپل حاکميت سيمه پراخوي.
