خاکسار
دا چې د طالبانو او امريکايانو تر منځ د مذاکراتو شپږم پړاو هم دا دی بې نتيجې پای ته ورسېدلو، خو تر اوسه يې لا دلائل معلوم نه دي چې ولې د مذاکراتو هر پړاو بې پايلې او بې نتيجې پای مومي خو شنونکي په دې اند دي چې امريکا لا تر اوسه هم په خپلو افکارو خيری او چرک لري او غواړي چې په طالبانو باندې په افغانستان کې خپل نظامي حضور ومني، او يا هم دا چې خليلزاد لا تر اوسه هم په نړۍ کې د دې لپاره وزر وهي او ګرځي تر څو پر طالبانو نړيوال او يا هم هر اړخيز فشار راوړي او د تسليمۍ لپاره يې چمتو کړي.
مګر خليلزاد هم نور له بار بار دا ډول هڅو ستړی دی ځکه خو نور نو کېدی شي په راتلونکي کې له دا ډول هڅو ناهيلی شي.
خو دلته د خليلزاد په شمول د هغو خلکو د ناپوهۍ يادونه کوو، کوم چې په پوه ناانصافۍ سره له طالبانو څخه د اوربند غوښتنه کوي.
د مذاکراتو له پيل راهيسې او بيا تر اوسه پورې دا دی نږدې څو مياشتې يې په بر کې ونيولې چې د امريکايانو او د کابل د ادارې بمبارونه او وحشتونه په عام ولس بانې د پخوا په پرتله څو چنده زيات شوي دي او يوازې وحشتونه او بريدونه نه بلکې د مقدساتو توهين او بې درېغه سپکاوی، د غير جنګي ماشومانو او ښځو شهادت، د کورنو، بازارانو، مدارسو، ښوونځيو او نورو اماکينو نړول هغه څه دي چې امريکايانو او ګډو حکومت په وروستيو کې د مذاکراتو له پيل سره سم زور ورکړی دی.
خو دا چې ځينې هغه خلک چې ځانونه انسان پرستان او ملت پرستان بولي او په ټولنيزو رسنيو کې داسې ښيي چې ګواکې تر ټولو ډېر د مسلمانانو او خصوصاً د افغانانو خير غوښتونکی دی او تر ټولو زيات د افغانانو په مرګ باندې خفه کېږي.
خو په عمل کې بيا دومره له ناپوهۍ سره مخ وي چې اصلاً د اوربند، سولې او مذاکراتو تر منځ فرق هم نشي کولی.
بس يوازې اوربند پېژني بس. خو د اوربند په قوانينو باندې بيا هېڅ نه پوهېږي.
دغه دول خلک چې يوازې له طالبانو څخه د اوربند غوښتنه کوي، په هغو حالاتو کې ولې چپ او غلي وي چې د ولسمشر غني د وحشي عسکرو او امريکايي عسکرو په چاپو کې درجنونه بې ګناه او غير جنګي خلک په شهادت رسېږي، ملکي خلک خو لا پرېږده هغه محصلين چې په ښاري پوهنتونو کې زده کړې تر سره کوي او لا هم برحاله زده کوونکي او محصلين وي خو د چاپې پر مهال بيا هم په شهادت رسول کېږی، هغه وخت دغه د افغانانو خواخوږي چېرته وي؟ هغه وخت ولې له امريکايانو څخه د دا ډول جناياتو د بندېدلو غوښتنه نه کوي؟
خو کله چې بيا د همدغو چاپو وحشي عمله په ښاري بېسونو کې د طالب تر ګوزار لاندې راشي نو دغه د افغانانو خواخوږي چې ځانونه بولي، بيا چيغې شوروع کړي چې افغان وژنه ده، طالب بايد اوربند وکړي، طالب بايد د روژې خاطر وکړي، او دې ورته نور توجيهات کوي.
دغه ډول خلکو ته دا معلومات هم نشته چې افغانانو خو په امريکايانو باندې حمله او يرغل نه دی کړی خو امريکا په افغانستان او ا فغانانو باندې يرغل او حمله کړې ده، نو افغانان خو د خپل هېواد د دفاع حق لري، بيا دوی ولې له طالبه د اوربند غوښتنه کوي؟
په داسې حال کې چې له خپل حريم څخه ساتنه او دفاع کول خو حيوانات هم کوي، انسان خو لا پرېږده .
نو چې له خپل هېواد څخه دفاع د طالبانو او افغانانو حق ده، نو بيا اوربند څه معنا لري؟ چې امريکايان له څوارلس زره کېلومټره مسافې څخه د جنګ دومره شوقيان او مينه وال دي چې افغانستان ته راځي او بيا پر افغانانو باندې وحشي چاپې او بمبارونه تر سره کوي او غواړي چې تسليم يې کړي او خپل غربي قوانين پرې عملي کړي، نو چې طالب د خپل ځان، هېواد، دين، ملي نواميسو او مقدساتو دفاع کوي، بيا ولې له غربيانو سره اوربند وکړي؟
د اوربند غوښتنه خو بايد امريکا وکړي، ځکه چې اوس تنګ دي او خپلو وتلو ته لاره پيدا کوي،
نو دغه ډول خلک چې په اوسني وخت کې له طالبانو څخه د اوربند غوښتنه کوي، ناپوه او د عقل له اړخه کمزوري دي ځکه چې په نا انصافي ډول د امريکايانو بريدونه نه غندي بلکې چپ او غلب پرې پاتې کېږي، خو کله چې طالبان خپل انتقامي بريدونه تر سره کړي نو بيا پرې غوسه وي او په ټولنيزو رسنيو کې نارې وهي چې طالبان بايد اوربند وکړي.
نو دغه ډول خلک بايد په دې پوه شي چې له طالبانو څخه په اوسنيو شرائطو کې د اوربند غوښتنه بې ځايه ده او بايد له عقل څخه کار واخيستل شي، او لومړی بايد له امريکايانو څخه وغوښتل شي چې ولې يې پر افغانانو باندې دومره ستر وحشت ته ملا تړلې ده؟
