د راپورونو له مخې، د ننګرهار ولايت په محبس کې د پوليسو او زندانیانو تر منځ اخ و ډب رامنځته شوی چې له دواړو غاړو پکې دولس کسان ټپيان شوي دي.
ويل کيږي، دغه شخړه د بيوو د لوړوالي او د عبدالسلام (مملوال) په نوم د يوه عالم پر سر رامنځته شوې ده.
د محبس څخه يوې سرچينې کابل ټکی کام ته وويل، د زندان په داخل کانتين (هټۍ) کې بنديانو باندې په لوړه بيه توکي پلورل کيدل چې د نوموړي عالم په مشرۍ لسګونه بنديانو د دغه بيې د ښکته کولو غوښتنه وکړه، خو دا چې په یاد کانتين کې د محبس مسؤول عبدالولي حصارکی هم شرکت لري نو د غوښتنه يې ونه منل شوه او د عبدالسلام په شمول يې کابل پلچرخي ته د ځينو بنديانو د ليږلو پریکړه وکړه.
یو تن زنداني چې خپل نوم ابراهيم راپيژني وايي، “د محبس امر عبدالولي حصارکي د خپلو شخصي ګټو په موخه مولوي عبدالسلام او نور لسګونه علماء کابل پلچرخي ته تبديل کړل، چې لوی لامل يې په کانتين کې د خوراکي توکو د نرخونو لوړوالي سره مخالفت و).
راپور زياتوي، د دغه نښتو او شخړو په جريان کې لس زندانيان او دوه پوليس ټپيان شوي هم دي او ويل کيږي د محبس د مسؤول له خوا یوه کتابخانه سوځول شوې چې قران کريمونه او نور ديني کتابونه پکې موجود و.
د محبس مشر عبدالولي ځينې کسان او په زندان کې د قرآن کريم د حلقو استادان توقيف ته اړولي و چې تيره شپه د زندانيانو په اعتصاب يې ځينې بيرته محبس ته ورکړي دي.
ويل کيږي، د دغه محبس مشر وخت ناوخت د خپلو شخصي ګټو لپاره ځينې کړنې ترسره کوي او په دې توګه له بنديانو پيسې ټولوي.
زندانيان وايي، له یوه بندي څخه شل زره کلدارې اخيستل کيږي بيا توقيف ته اړول کيږي، د څرخي زندان ته د وړلو اوازه خپره کړي او بيا له زندانيانو څخه پيسې اخلي چې نوم به يې له ليست څخه وويستل شي، ډیری وخت د بنديانو د بند موده پوره شوې وي خو عبدالولي يې د خوشې کيدو پر سر بيا هم پيسې اخلي، جزايي کول او بيرته پرې پيسې اخيستل، درملو کې ورنه پيسې اخيستل، محبس کې د چرسو او پوډرو پلول.
له بله پلوه د پلچرخي زندان څخه يوه باوري سرچينې کابل ټکی کام ته وويل، چې د جلال اباد له محبس څخه له شپيتو زيات زندانيان وروړل شوي دي.
نوموړی وايي، دوی د نرخونو د لوړوالي او نورو ستونزو له کبله شکايتونه درلودل خو چارواکو ورته دغه شکایتونه بهانه وګرځول او له ننګرهار يې پلچرخي ته انتقال کړل.
دا او دې ته ورته ډول نورې ډيرې کړنې دي چې د محبس د امر عبدالولي او مسؤولينو له خوا په زندان کې ترسره کيږي.
زندانيان وايي، ډير کرته يې د خپلو حقوقي غوښتنو لپاره اعتصابونه کړي چې تر څو ورځو پورې عملي شي خو څو ورځې وروسته ورته بيا پام نه کيږي.
د محبس امر عبدالولي حصارکی په دې اړه له خبرو کولو ډډه کوي او پرې لګول شويو تورونو په اړه رسنيو ته معلومات نه ورکوي.
دا یوازې د ننګرهار محبس نه دی زندانيان يې د مسؤولينو او بيلابيلو ستونزو څخه شکایت کوي بلکې د هيواد په ډیری زندانونو کې ورته ډول حالت روان دی چې په وروستو کې په پلچرخي زندان کې د دغه حالت څخه سلګونه زندانيانو اعتصابونه وکړل او خپلې خولې يې ګنډلې وې خو تر اوسه ورته د هغوی حق نه در ورکړل شوی.
د يادونې ده، چې څو ورځې مخکې په پلچرخي زندان کې د طالب په تور نيول شوی له اتيا کلونو زيات سپينږيری و خو د تداوۍ نه کولو او هغه ته د ژوند د اسانتیاوو نه برابرولو له کبله وفات شو.
