کابل ټکی کام( جمعه، ۲۶غوایي، ۱۳۹۸)
ایراني چارواکو امریکا ته ګواښ کړی چې بیړۍ یې په فارس خلیج کې په نښه کولای شي.
فارس خبري اژانس د ایران د سپاه پاسداران د مرستیال محمد صالح له قوله لیکلي چې د ایران توغندي کولای شي، په ډیره اسانۍ سره په فارس خلیج کې د امریکا بیړۍ خپل هدف وګرځوي.
د سرچینې په خبره چې صالح ویلي، امریکا په اوسني وضعیت کې نشي کولای بله جګړه پیل کړي.
صالح دا خبرې په داسې حال کې کړي چې امریکا خپله الوتکې انتقالونکې بیړۍ فارس خلیج ته لیږلې ده.
د ایران او امریګا ترمنځ ترینګلی حالت ورځ تر بلې نور هم زیاتیږي او دواړه هیوادونه یو بل ته د جګړې ګواښونه کوي.
دا حالت وروسته له هغه ډیر ترینګلی شو چې امریکا د ایران سپاه پاسداران ډله په تور لیست کې شامله کړه او همدا رنګه یې د ایران د تیلو په صادراتو هم بندیز ولګاوه.
ایران د دې کار په غبرګون د اتومې تړون ځینې معاهدې ماتې کړې او ډول ډول نور غبرګونونه یې وښودل.
د ایران دفاع وزیر تیره ورځ ویلي وو چې د امریکا او اسرائیلو اتحاد به دړې وړې کا.
