کابل ټکی کام ( یکشنبه، ۲۹ غوايي ، ۱۳۹۸ل)
د حیرتان بندر مسوولینو له دې لارې دصادراتو په کمېدا خواشیني ښودلې، دوی وایي چې ددغه بندر له لارې د وارداتو کچه لوړه شوې ده خو د صادراتو کچه بیا په نشت حساب ده.
د بلخ د صنعت او سوداګرۍ رییس شېر احمد سپاهي زاده وایي، چې د حیرتان بندر له لارې هره ورځ تر شپېتو لاریو پورې توکي هېواد ته وارېدېږي. دده په خبره د وارداتو په پرتله د صادراتو کچه خورا کمه ده.
هغه زیاته کړې چې هره ورځ نږدې شپږ لارۍ توکي له دې بندر صادرېږي. سپاهي زاده وایي چې ددې بندر له لارې له قزاقستان، روسیې، چین او ځينو نورو هېوادونو سره سوداګریزه راکړه ورکړه ترسره کېږي.
تردې وړاندې دمتشبثینو ټولنې له یوشمېر نورو تجارتي مشکلاتو هم پرده پورته کړې وه، اوویلي یې وو چې په افغانستان کې دتجارتي صادراتو اووارداتو پروړاندې ترټولو لوی خنډونه بهرنیو ځواکونو ایجاد کړي.
