کابل ټکی کام( سه شنبه، ۷غبرګولي، ۱۳۹۸)
لویې څارنوالۍ ویلي چې د ولسمشر غني پخوانی ستر سلاکار حبیب الله احمدزی دې د هغو تورنو په اړه سپیناوی وړاندې کړي چې په دې وروستیو کې یې په ارګ لګولي وو.
حبیب الله احمدزي له یو خصوصي تلویزون(خورشید) سره په مرکه کې ویلي وو چې په ارګ کې فحشا ته کار روان دی.
ده همدا راز زیاته کړې وه چې اکثره ښځې ولسي جرګې ته ځکه کامیابې شوي چې په ارګ کې یې له خاصو کسانو سره غیر مشروع او ناقانونه اړیکې ټینګې کړې وې.
د احمدزي د دې خبرو په غبرګون کې د ولسمشرۍ ماڼۍ ویاند هارون چخانسوري وویل چې د احمدزي یادې ادعاوې بې بنسټه او دروغ دي.
احمدزي د چخانسوري د دې خبرو په ځواب کې ټینګار وکړ چې دی له خپلو خبرو نه اوړي او په وینا یې له ده سره په دې اړه کافي شواهد شته.
نن بیا د لویې څارنوالۍ ویاند جمشید رسولي ویلي چې جنرال احمدزی دې د دې څرګندونو په اړه د لویې څارنوالۍ لخوا مؤظف شوي پلاوي ته شواهد او اسناد په لاس کې ورکړي.
د رسولي په وینا چې احمدزی دې د روانې اونۍ تر پایه د خپلو ادعاوو په اړه اسناد او ثبوتونه وړاندې کړي.
رسولي ویلي چې تیره ورځ ارګ له لویې څارنوالۍ غوښتنه کړې چې د احمدزي د وروستیو څرګندونو په اړه دې څیړنې پیل کړي
