کابل ټکی کام( سه شنبه، ۷غبرګولي، ۱۳۹۸)
روسیه وایي چې بهرني ځواکونه دې ژر تر ژره له افغانستانه ووځي او دا هیواد دې پریږدي.
د روسیې د بهرنیو چارو وزیر سرګي لاوروف ویلي چې بهرني ځواکونه باید په بشپړ ډول له افغانستانه ووځي.
لاوروف دا خبرې په داسې حال کې کوي چې نن مسکو د لوړ پوړو طالب استازو او پخوانیو حکومتي چارواکو کوربتوب کوي.
روسیې نن د افغانستان او روسیې ترمنځ د سل کلنو دیپلوماتیکو اړیکو لمانځغونډه جوړه کړې وه چې په دې غونډه کې د طالبانو د مشر سیاسي مرستیال ملا برادر اخوند هم ګډون کړی وو.
دې غونډې ته د وینا پر مهال سرګي لاوروف بین الافغاني خبرو ته په اشارې وویل چې دی په ټولو خواوو غږ کوي ترڅو د داسې خبرو یو پړا پیل کړي چې په زیاته اندازه سیاسي او ټولنیز استازي پکې شامل وي.
د یادونې وړ ده چې سبا ته به طالب مشران د ځینو پخوانیو هغو چارواکو سره هم غونډه ولري چې مسکو ته د نني مجلس د ګډون لپاره تللي وو.
د دې افغاني سیاسیونو مشري پخوانی ولسمشر حامد کرزی کوي.
