ایران وايي، امریکايي بندیان یې خوشي کړي دي

کابل ټکی کام (چهارشنبه ۲۳ مرغومي ۱۳۹۴ ل) عبدالله هاشمي
د ایران تلویزیون خبر ورکړی دی چې د امریکا هغه لس کسان یې بېرته خوشي کړي دي چې دوی یوه ورځ مخکې خلیج فارس کې د ایران په اوبو کې نیولي وو.
دغه کسان په دوه کشتیو کې سپاره وو چې په غلطۍ سره د ایران اوبو ته داخل شول.
امریکا وايي چې د سه شنبې په ورځ ددوی کشتۍ هغه مهال د ایراني فوځ لخوا ونیول شوې کله چې د روزنې په مهال په غلطۍ سره د ایران اوبو ته داخلې شوې وې.
پرون د پېښې سره سمدلاسه د امریکا حکومت له ایران څخه بښنه وغوښته او ویې ویل چې دا کار قصدي ندی شوی.
دا پېښه په داسې وخت کې رامنځ ته کيږي چې د ایران او امریکا ترمنځ د یورانیمو د غني کولو په سره معامله ترسره کېدونکې ده.
پرون د ایران د بحري قوې مشر جنرال علي فداوي وویل چې پېښه د تخنیکې ستونزې له امله رامنځ ته شوې ده.
د ایران له تلویزیون سره په مرکه کې ده وویل چې د امریکایانو دې کار ته د خطا په سترګه ګوري، او یقین لري چې دا کار د جاسوسۍ په موخه ندی ترسره شوی.
له پېښې څو لحظې وروسته د امریکا د بهرنیو چارو وزیر د ایران د بهرنیو چارو وزیر ته تلفون وکړ او بښنه یې ورڅخه وغوښته او همداشان د اتومي انرژۍ په اړه یې هم ورسره خبرې وکړې.
پدې لسو کسانو کې ۹ کسان نارینه وو او یوه ښځينه وه چې د ایران د بحري ځواکونو له لوري ونیول شول او د ایران خاورې ته یې انتقال کړل.