کابل ټکی کام ( جمعه ، ۱۷ غبرګولی ، ۱۳۹۸ل)
یو شمېر څېړنو ثابته کړې چې دهیواد لوړه سلنه وګړي له یو بشري ناورین سره مخ کېدونکي دي، نن (جون اوومه) د خوړو د خوندیتوب نړیواله ورځ هم ده.
د هېواد د اقتصاد وزارت رسمي شمېرې ښیې چې د نفوسو ۴۴ سلنه وګړي د خوړو د خوندیتوب له ستونزې سره مخامخ دي.
دغه وزارت وایي، وروستۍ ارزونې چې اقتصاد وزارت له نړیوال بانک سره په ګډه ترسره کړې په ډاګه کوي، چې په افغانستان کې د بې وزلۍ کچه ۵۴،۵ سلنې ته رسېږي او همدا رنګه ۴۴ سلنه افغانان د خوړو له نه خوندیتوب سره مخ دي،
یعنې په ورځني ډول نه شي کولای چې د اړتیا وړ خواړه ترلاسه کړي.” نیمروز، بادغېس، بدخشان او نورستان هغه ولایتونه دي، چې اوسېدونکي یې خوندي خوړو ته د نورو ولایتونو په پرتله لږ لاسرسی لري. بې وزلي، ناامني، کمزوری اقتصاد، وچکالي، بې ځایه کېدل، د کډوالو بېرته راستنېدل، د مرستو او پانګونو کمېدل، په دغه هېواد کې د خوړو د نه خوندیتوب مهم عوامل په ګوته شوي دي.
یوشمېر کتونکي بیا ددې ټولو دربدریو عاملین دحکومت په ګدۍ ناست چارواکي بولي، اوزیاتوي چې ټولې ناخوالې دحکومتي چارواکو دفساداتو له امله رامنځته کېږي.
