کابل ټکی کام ( جمعه ، ۱۷ غبرګولی ، ۱۳۹۸ل)
افغان سوداګرو دتېر په څېر یوځل بیا اندیښنه ښودلې، اودخپلو پانګو دانتقال ګواښ یې کړی.
دې سوداګرو اندېښنه ښودلې چې امنیت ته یې پام نه کېږي، نه هم ددوی او نه یې د اولادونو ژوند خوندي دی.
د ملي شورا غړو هم په ټول افغانستان کې سوداګر له جدي امنیتي ګواښ سره مخ کېدونکي بللي، ددوی په وینا که ژوند ته یې پام ونشي د افغانستان پر ځای به نورو هېوادونو ته خپلې پانګې انتقال کړي.
دوی له حکومت څخه غوښتنه کړې چې د سوداګرو ژوند ته دې جدي تدابیر ونیسي.
کورنیو چارو وزارت بیا په دې برخه کې د هرډول همکارۍ ژمنه کړې او زیاته کړې یې ده چې دوی چمتو دي ترڅو د خپلو سوداګرو امنیت ته پام وکړي.
د ولسي جرګې غړي وايي څومره چې ویل کېږي دومره امنیت نه دی خراب او افغان سوداګر باید په خپله خاوره کې پانګونه وکړي او ولس ته د کار زمینه برابره کړي.
په دې وروستیو کې د ټول هېواد په کچه لوی ښارونه دهدفي وژنو، تښتونو او نورو دربدریو شاهد دي چې نا امنۍ یې زیاتې کړي.
په همدې اساس دهېواد دسوداګرو اوپانګه والو ژوند هم ورسره تریخ شوی دی.
