شمالي وزيرستان: څلور پاکستاني پوځيان وژل شوي، درې ټپيان دي
(کابل ټکی کام، ۱۳۹۸، غبرګولی ۱۸)
د پاکستان پوځ په یوه خپره کړې خبرپاڼه کې ويلي چې شمالي وزيرستان کې يې پر پوځي موټر چاودنې اوو تنو پوځيانو ته مرګ ژوبله اړولې ده.
خبرپاڼه زياتوي، چاودنه د سړک د غاړې وه او په خړ کمر سيمه کې رامنځته شوې ده.
پوځ د څلور پوځيانو د وژل کيدو او درې نورو د ټپي کيدو خبر ورکړی او د دغه هيواد لومړي وزير عمران خان پيښه غندلې ده.
خړ کمر هغه سيمه ده چې شاوخوا دوه اوونۍ مخکې پکې د پاکستاني پوځ او د پښتون ژغورنې غورزنګ تر منځ هم لانجه رامنځته شوې وه.
د پاکستان پوځ ادعا کړې وه چې د ياد غورزنګ کسانو پرې وسله وال بريد کړی و او په ځوابي برید کې يې څو تنه وژل شوي خو غورزنګ دغه ادعا ردوي.
د راپورونو له مخې، له تيرو څو مياشتو راهيسې په شمالي وزيرستان کې وضعيت ښه و خو د خړ کمر پيښې وروسته حالات خراب شوي او هلته یو ځل بيا ګرزبنديز لګيدلی دی.
تر دې وړاندې هم په شمالي وزيستان او د دغه هيواد په ځينو نورو قبايلو سيمو کې پر پاکستاني پوځ چاودنې او وسله وال بريدونه شوي چې د ځينو مسؤوليت يې تحريک طالبان پاکستان او داعش ډلې په غاړه اخيستی خو تر اوسه د پرونۍ چاودنې پړه چا نه ده منلې.
