(کابل ټکی کام، ۱۳۹۸، غبرګولی ۱۸)
ټاکل شوې چې نن په افغانستان کې د انتخاباتو د رايې ورکولو د تقويتي نوم ليکنې بهير پيل شي خو د ازادو او عادلانه ټاکنو بنسټ “فيفا“ وايي، ښايي په دغه نوم ليکنه کې محدود کسان خپل نومونه ثبت کړي.
په بهير کې به هغه څوک برخه اخلي چې نوي هيواد ته راستانه شوي وي، یا يې د ولسي جرګې انتخاباتو کې نوملیکنه نه وي کړي او یا روان کال کې اتلس کلنۍ ته رسيدلې وي.
د انتاباتو د خپلواک کمېسيون د دارلانشاء رئيس حبيب الرحمان ننګ وايي، په دې اړه چمتوووالی نيول شوی زياتوي یوازې په غزني ولايت کې چې په تيرو ټاکنو کې پکې انتخابات نه و شوي عمومي نوم ليکنه کيږي چې ۲۷۴ مرکزونه ورته ځانګړي شوي او په ۳۳ ولايتونو کې به په ۴۵۸ مرکزونو کې د تقويتي نوم ليکنې پروسه د چنګاښ د مياشتې تر لومړۍ نيټې دوام ولري.
خو د ازادو او عادلانه ټاکنو د بنسټ اجرائيوي مشر یوسف رشيد وايي، د دغه بهير له مخکې بايد خلکو ته عامه پوهاوی ورکړل شوی وای، خلک ډاډمن شوی وای چې پخوانۍ ستونزې به نه تکراريږي خو په وينا يې دا هيڅ نشته نو ښايي چې یاده پروسه هراړخيزه او عمومي نه وي او یو څو کسان به پکې نوم ليکنه وکړي.
د روان کال تلې مياشتې شپږمه نيټه د راتلونکو ولسمشريزو ټاکنو لپاره ټاکل شوې ده.
په تيرو پارلماني ټاکنو کې د درغليو، نا امنۍ، او په انتخاباتو د بې باورۍ له کبله د افغانستان له نيمو زياتو خلکو په ټاکنو کې برخه وانخيسته او د راپورونو له مخې ډیری کسان د پيسو او نورو ناوړه لارو پارلمان ته تللي دي.
