طالبان: حکومتي کارمندان دې د امریکایانو لپاره قرباني نه ورکوي؛ زمونږ سره دې په لاندې شميرو اړيکه کې شي

(کابل ټکی کام، ۱۳۹۸، غبرګولی ۱۹)

طالبانو یو ځل بيا په ګډ حکومت کې کارکوونکو، عسکرو او چارواکو ته بلنه ورکړې چې له بې ځايه مقاومت او د امریکا د ګټو لپاره ځانونه قرباني نه کړي او له دوی سره اړيکې ونيسي.

طالب وياند ذبیح الله مجاهد په خپله رسمي ټويټرپاڼه د (اسلامي امارت د ارشاد دعوت، جلب او جذب کميسيون) له خوا اعلاميه خپره کړې چې وايي، اتلس کاله مخکې امريکايانو په افغانستان يرغل وکړ، اسلامي نظام يې له منځه يووړ، د افغانانو خپلواکي يې یرغمل کړه او په جګړو کې لکونه افغانان شهيدان، شکنجه او خپلو کورونو پريښودو ته اړ کړل شول.

اعلاميه کې راغلي، چې امريکا د افغانانو د قربانيو او تاريخي مقاومت په نتيجه کې له ماتې او شکست سره مخ شوې، ځانته د وتلو لاره ګوري زياتوي ” امریکایان که څه هم په دې لټه کې دي چې  له افغانستان څخه خپلې قواوي وباسي؛ ولې ترڅنګ یې هڅه کوي چې خپله دغه شکست خورده او رسوا جګړه افغانانو ته په میراث پریږدي او نوره یې اوږده کړي”.

طالبانو حکومتي کارمندانو، عسکرو، پوليسو او چارواکو ته بلنه ورکړې څو د جګړې او بې ځايه مقاومت لاره پريږدي، د حقايقو په درک کولو سره خپلې دندې خوشې کړي او (د اسلامي امارت حقپالونکي اونجات بښونکي غیږي ته پناه راوړي).

په اعلاميه کې راغلي، چې اسلامي امارت خپله غېږه د ټولو هغو افغانانو لپاره خلاصه کړې چې په يو ډول نه يو ډول د کابل د ګوډاګۍ ادارې په ليکو کې کار کوي، چې خپل ژوند وژغوري لومړی خو له يرغلګرو سره په خپلو پخوانيو همکاريو پښېمانه او الله جل جلاله ته توبه وباسي او بيا عملا هم د يرغلګرو او د هغوی د غلامانو (ګوډاګۍ ادارې ) له ليکو څخه جلا شي او خپله مرسته ورسره پای ته ورسوي.

طالبانو د اعلاميې په اخره کې د هغه حکومتي کارمندانو لپاره چې له حکومته جلا کيږي د اړيکو شميرې هم اعلان کړي چې دوه يې د مبايل نمبرې  (   ۰۷۰۸۲۹۸۱۹۵ )  (۰۷۹۰۱۹۵۶۲۶) یو د مخابرې نمبر (دعوت په نامه د مخابري نمبر: (۷۴۴۵) او ايميل ادرسونه : ( iea.dawat@yahoo.com) (jananasim@yahoo.com) چې پوليس، عسکر، چارواکي او حکومتي کارمندان ورسره پرې اړيکه ونيسي.

دا په داسې حال کې ده، چې د طالبانو مشر ملا هیبت الله اخندزاده په تير اختريز پيغام کې هم حکومتي کارمندانو ته بلنه ورکړې وه څو خپلې دندې پريږدي او طالبانو سره یوځای شي.

طالبان د جلب و جذب او دعوت وارشاد په نوم ځانګړی کميسيون لري چې وخت ناوخت ورته د هيواد په بيلابيلو سيمو کې عسکر، پوليس او حکومتي چارواکي تسلميږي.