کابل ټکی کام ( یکشنبه ، ۱۹ غبرګولی ، ۱۳۹۸ل)
دملي امنیت پخوانی رئیس او راتلونکو ولسمشریزو ټاکنوته نوماند رحمت الله نبیل وایي، اوسنی حکومت د سولې برخه کې د یوې سیاسي هوکړې د رامنځته کولو وړتیا نه لري.
نوموړي له ایران نړیوال ټلویزیون سره په مرکه کې ویلي، د سولې برخه کې د خلیلزاد له هڅو ملاتړ کوي خو په خبره یې په دې برخه کې د هغه له چلند سره موافق نه دی.
نبیل ویلي، د سولې برخه کې د خلیلزاد چلند د طالبانو سیاسي مشروعیت زیات کړی دی. د نبیل په خبره افغانان چې دا پروسه ورته تر هر څه ډېر ارزښت لري هیڅ له دې پروسې معلومات نه لري او هر څه ترې پټ ساتل شوي دي.
نبیل زیاته کړې، اوس هر سیاستوال، اوحکومتي چارواکی هڅه کوي چې له طالبانو سره پټې اړیکې زیاتې کړي د هغه په خبره که چېرته دا اړیکې د هېواد او خلکو د ښېګڼې لپاره وای ستونزه یې نه لرله خو زیاتوي، دا اړیکې په دې خاطر دي چې دوی خپلې ګټې خوندي کړي.
نبیل په خپله مرکه کې له طالبانو سره د پاکستان اړیکو ته په اشارې ویلي، هغه هېواد کولی شي په ډېره اسانۍ طالبان د تاوتریخوالي پای ته رسولو ته وهڅوي خو په وینا یې پاکستان تر اوسه په دې برخه کې اړینه همکاري نه ده کړې.
تردې وړاندې هم یوشمېر کتونکو دیوشمېر هېوادونو لخوا طالبانو ته د وروستیو ناستو زمینه سازي دوی ته دمشروعیت په معنا بللې وې.
