(کابل ټکی کام، ۱۳۹۸، غبرګولی ۲۵)
د غزني ولايت د خواجه عمري ولسوالۍ اوسيدونکي وايي، هره ورځ يې د دولتي ځواکونو له خوا پر کورونو د هاوان بريدونه کيږي او ملکيانو ته پکې مرګ ژوبله اوړي.
د خواجه عمري یوه اوسيدونکي وويل، پرون د جمعې په ورځ د کارېز پر کلي دولتي ځواکونو هاوان مرمۍ وتوغوله چې د ښځو او ماشومانو په شمول پکې پنځو کسانو ته مرګ ژوبله واوښته.
د يادې سيمې اوسيدونکو د دوو تنو جسدونه د ولايت مقام مخې ته د احتجاج په توګه راوړي و او ويل يې چې د دولتي ځواکونو له لوري يې کورونه ويشتل کيږي، هره ورځ یو یا دوه ملکي کسان وژل کيږي، کښتونه مو خراب شول، مالونه مو مړه شول، خلک په رواني ناروغيو اخته دي او د شپې له خوا په ګومبتو کې مالونه سره ويده کيږي.
د سيمې یو بل اوسيدنکی مالک وايي : ” په کور کې يې هوان لګيدلی، ښځه يې ټپي او غوا يې مړه شوې، ماشومان يې بې حاله دي زياتوي اتمه ورځ ده چې جګړه روانه ده، دولتي ځواکونه د طالبانو بیرغونه په سترګو ویني، هغه نه ولي، خو غریب او بېچاره په کې وژل کېږي.”
څو ورځې وړاندې د غزني امنيتي مسؤولينو ادعا وکړه چې د خواجه عمري ولسوالۍ يې له يوه کال ځنډ وروسته له طالبانو ونيوله خو ځايي اوسيدونکي وايي یوازې د یادې ولسوالۍ ودانۍ له دولت سره ده او په شاوخوا سيمو کې طالبان فعاليت کوي چې وخت ناوخت پکې د ښکېلو غاړو تر منځ جګړې کېږي.
