کابل ټکی کام( شنبه، ۲۵غبرګولي، ۱۳۹۸)
په ملګرو ملتونو کې د کویت استازی منصور العتیبي د ایران په اړه د امریکا وروستۍ ادعا د پوښتنې وړ بللې ده.
العتیبي دا د امریکا لخوا په ایران یو تور بللی او زیاته کړې یې ده چې د دې پوښتنه باید وشي.
ده همدا راز ویلي چې د امریکا لپاره به د دې ادعا ثبوت یو سخت کار وي.
منصور العتیبي دا خبرې وروسته له هغه کړي چې په عمان کې د تیلو په کښتیو کې چاودنې وشوې او اور یې واخست.
له دې چاودنو وروسته د تیلو بیه څلور سلنه لوړه شوه.
امریکا د دې بریدونو تر شا د ایران لاس وباله او ویې ویل چې دوی ته په لاس ته ورغلې ویډیو کې لیدل کیږي چې یوه ایرانۍ کښتۍ د تیلو له کښتۍ ناچاودېدلی ماین اخوا کوي.
ایران د امریکا دا ادعا بې بنسټه بللې او وایي، دا هر څه له ایران سره د کرکې پر بنسټ کیږي.
په هورموز تنګي کې د دې پیښې له رامنځته کیدو وروسته د بد حالت خبر ورکړل شوی دی.
د ملګرو ملتونو سرمنشي هم د یادې پیښې د صیي او خپلواکې څیړنې غوښتنه کړې ده.
امریکا کابو میاشت وړاندې هم په دوبۍ کې د تیلو په ټانکرو برید د ایران کار بللی وو خو اسناد او شوهد یې نه دي وړاندې کړي، ایران د امریکا هغه ادعا هم بې ځایه بللې وه.
