کابل ټکی کام( سه شنبه، ۲۷ غبرګولي، ۱۳۹۸)
په ولسي جرګه کې د کابل د خلکو د استازي امیرګل شاهین ساتونکو یو سوداګر د توپک په کونداغونو وهلی او سر یې پرې وینې کړی دی.
دا پیښه نن د کابل ښار د جاده نادرپښتون سیمه کې رامنځته شوې او د سوداګر نوم نقیب الله احمدزی ښودل شوی دی.
په ټولنیزو رسنیو کې د دې پیښې یوه ویډیو هم خپره شوې ده.
امیرګل شاهین بیا وایي چې د پیښې اصلي بڼه داسې نه ده لکه په سوشل میډیا کې چې خپره شوې بلکې په وینا یې، له نقیب الله سره یې د دوکانونو پر سر څه لانجه وه او د دې لانجې د حل په وخت کې لفظي شخړه رامنځته شوه.
د شاهین په وینا له لفظي شخړې وروسته احمدزي په ما ګذار کړی چې له هغې وروسته ساتونکو په احمدزي ځوابي برید وکړ.
دا په داسې حال کې ده چې تیره ورځ د مشرانو جرګې ویلي وو، د ولسي جرګې ځیني غړي بدمعاشان دي او بدمعاشي کوي.
دا لومړی ځل نه دی چې د ولسي جرګې ساتونکي یو څوک وهي، څو ځله مخکې هم ورته پیښې رامنځته شوي دي.
